Human Rights Commission-ah Mizoram journalist-te an inlan

Baraibi Zophaia nikum March thlaa Assam police-in kut an thlak chungchangah Mizoram journalist pangate chu nimin khan Assam Human Rights Commission (AHRC), Barak Valley Division commissioner Dr Anwaruddin Chaudhury hmaah an inlan.

AHRC Commissioner hnenah hian Mizoram journalist-te chuan Assam police-te'n kut an thlâk dan an sawi a, document hrang hrangte an thehlut nghal. Journalist-te thusawi leh document-te chu Assam sorkarah a thehluh tur thu Commissioner chuan a sawi a, "Buaina a thlen laia Assam police hotute leh civil administration hotute thu ka zawt fiah ve leh ang," a ti.

Dr Anwaruddin Chaudhury hian Assam lam insawifiahna a hriat hunah National Human Rights Commission hnenah report a thlen dawn a ni. Mizoram journalist-te hi Guwahati Mizoram House deputy resident commissioner Donny Lalruatsanga'n a ṭul angin a lo buaipui a ni.

MZP-in Bairabi Zophai hmuna Zofate Chawlhbûk sak a tum ṭuma buaina chhuaka Mizoram journalist, Assam police kuttuarte hi mi pasarih an ni a, mi pahnih chu harsatna avangin Assam Human Right Commission hmaah an inlan ve lo.