MPSC chungchanga sorkar thil tih dan Dodal turin eptu pawlte'n mipui an ngen

Mizoram Pradesh Congress Committee (MPCC) leh Mizoram Peoples’ Conference (MPC) ṭhalaite chuan, MNF kaihhruai sorkarin Mizoram Public Service Commission (MPSC) kut aṭanga hna lakna a chhuhsak ṭhen chu MNF-in an mi duhsak zawngte sorkar hnaa thun an tumna a nih thu an sawi a; MNF sorkar thil tih tum dan chu a theih ang anga dodal turin Mizoram mipui an ngen.

MPCC Media chairman Lallianchhunga chuan, MPSC chu UPSC ang bawka Indian Constitution Article 315 anga siam, thuneihna sang tak nei, sorkarin a thunun theih loh a nih thu a sawi a, "Hun kal tawhah MPSC hna lakin sawisel a hlawh khát hle a, a thiam ber ber, sawipuitu nei hauh loa an inziah tlinna ṭhin a nih avangin MPSC kaltlanga thawktu lak reng reng chu thiam leh ṭha tak an ni zel," a ti a; Central lama Staff Selection Commission (SSC) pawh Parliament Estimate Committee rawtna anga din, thuneihna sang tak nei a nih thu a sawi.

MNF sorkarin MPSC ring zo loa sorkar hnathawk tam zawk lakna tur chhuhsak tuma thutlukna a siam chu demin Lallianchhunga chuan, "An duh tâwka an tuhnun theih tur, state sorkar thuneihna hnuaia thawk tur Mizoram Subordinate Service Selection Board (MSSSB) din an tum leh hi MPCC leh MPC chuan pawi kan ti tak zet. Mizoram mipui, a bikin ṭhalai hna zawng laite zah lohna dik takah kan ngai," a ti.

Lallianchhunga chuan, sorkar hnathawk lak chungchangah MNF sorkar kal tawhin hmingchhiatna nasa tak a nei tawh ṭhin tih sawiin, "Police laknaah te, zirtirtu leh sorkar hnathawk dang lak chungchangah langsar taka party mite duhsak an chíng ṭhin," an ti a; muster roll-a zirtirtu 946 lak an tum mekah pawh School Education minister Lalchhandama Ralte-in Mizo Hnam Run, MNF block leh unit list a awm lo ang tih Assembly House-ah a tiam theih loh thu a sawi.

MPSC chu MNF sorkarin ngaihthah a, hrêk beh a tum hrim hrim nia an hriat thu sawiin Lallianchhunga chuan, "Hei hi budget tharah a lang chiang," a ti. MPCC Media Chairman sawi danin, financial year 2018-19 ah MPSC-in advertisement atan cheng nuai 25.55 an hman laiin, 2019-20 budget-ah cheng nuai 4 chauh an dah a, MPSC minor work-ah 2018-19 chhungin nuai 87.78 an hman laiin, 2019-20 ah cheng nuai 6.30 chauh an dah. Secret service expenditure-ah kum hmasaah nuai 69 an hman laiin, budget tharah nuai 20 chauh an dah bawk.

MPCC leh MPC aiawhte chuan, "MPSC thuneihna chhuhsak tuma MNF sorkar hmalakna dik lo tak hi a theih ang anga lo dodal turin Mizoram mipui kan ngen. MNF sorkar pawh MPSC thuneihna chhuhsak tuma a hmalak mekna bànsan nghal tur leh, ṭhalaite tana inelna khawvel thianghlim leh ṭha zawk siam turin kan phût a ni," an ti a; a ṭul angin na taka dodal an tum thu an puang nghal a ni.