KHAWTHLIR

Information & Public Relations (IPR) director thar Lallianpuii chuan nimin khan a pisaah MJA hruaitute lêngah sáwmin thingpui a inpui. Lallianpuii chuan, MJA leh IPR department thawhho tawhna zawng zawngah lawmthu sawiin, hun lo kal zel turah pawh ṭha taka an thawhho zel theih a beisei thu leh thurâwnte a beisei thu a sawi a; MJA president Zonunsanga Khiangte leh MJA hruaitute leh IPRO-te'n thu an sawi bawk.

Pathianni khan prime minister Narendra Modi kaihhruaiin New Delhi-ah Parliament session chungchangah meeting neih a ni a, Mizoram Lok Sabha MP C Lalrosanga pawh a tel. Mizoram MP hian Mizoram leh hmarchhak biala ṭhenawm state-te'n mamawh an neih hrang hrangte a sawi chhuak a ni.

Chief minister Zoramthanga chuan MNF member Dr ZR Thiamsanga zawhna chhangin, Champhaia Horticulture sub-division chu division-ah hlânkai tum mek a nih thu House a hrilh. H Lalzirliana zawhna chhangin, Mamit district-a Horticulture division office hmunpui Tuidama mi, Mamita sawn chungchang chu an lo en zui tur thu a sawi.

Tun hnaia sorkarin doctor a lak thar mi 31-te tan nimin khan Directorate of Health Services conference hall-ah ni li awh tur induction training buatsaih a ni a, Health principal director Dr F Lallianhlira'n a hawng. Training-ah hian doctor-te hi mithiam sawm bikten office procedure, job responsibilities, finance leh office matters chungchang an zirtir dawn a ni.

Excise & Narcotics department chuan May 2019 chhung khan zu zuar 172, zu rûi 37, rakzu litre 5,740.59, zu bilh lai ṭín 4,557, sap zu (ûm puitling) 1,100 leh zu kaihhnawihah lirthei 14 an man.