Chief Secretary-in Mizoram Kailawn a hawng

Mizoram sorkar leh IndianInstitute of Management (IIM) Calcutta-a Innovation Park ṭangkawpin an buatsaih, Mizoram Kailawn, 2019 chu nimin khan Mizoram State Entrepreneurship Development Monitoring Committee (MEDMOC) chairman Lalnunmawia Chuau­ngo, chief secretary-in a hawng.

Chief Secretary chuan, Mizoram sorkar leh IIM-Calcutta Innovation Park-te thawh dunna fakin, "An hmalakna avangin Mizoramin entrepreneurship leh sumdawnna kawngah hma kan sawn nasa hle. Mizo ṭhalaite zingah entrepreneurship lama tui tak tak, mahni tui zawng hmanga eizawn tum, mi tumruh leh beiseiawm tam tak hmuh tur an awm hi a lawmawm hle a ni," a ti.

Lalnunmawia Chuaungo chuan, hlawhtling turin lehkha thiam chungchuang nih a pawimawh ber vek lo tih sawiin, "Sumdawnna thinlung pûa mahni thiam zawng leh tui zawnga eizawnna kawng dap thiam te, taimak, dawhtheih leh teirei peihte hi hlawhtlinna kawng zawhna atana thil pawimawh a ni zawk," a ti a; ṭhalate chu hlawhchhamna anga lang pawh hlawhtlinna kawng inhawnna a ni zawk thei tih hre turin a chah.

MEMDOC alternate chairman Dr C Vanlalramsanga, Planning secretary sawi danin, Mizoram Kailawn, Mizoram Rahbi leh Leitlangpui Rahbi kaltlangin kum nga chhungin entrepreneur bul ṭan meknaah mi 1,000 hrual hman tum a ni.

Mizoram Kailawn 2017 leh Mizoram Kailawn 2018-ah diltu mi 620 chuang an awm a, chung zinga mi 83 chu boot camp-a tel tura thlan an ni. Mizoram Kailawn ṭum thumna (2019)-ah hian district hrang hrangah leh zirna-inahte outreach programme neih tum a ni a, boot-camp leh pitching competition pawh district level-a buatsaih tum a ni.