Ngaizel khâmah mumal zawka hmalak tum; Hunthar Veng lei tlahniam atan cheng vbc. 20

Disaster Management & Rehabilitation (DMR) minister Lalchamliana chuan, Ngaizel kawng chung khâma lung tla ṭhin ven nan DMR department-in ṭha leh mumal zawka hmalak a tum mek thu Assembly House a hrilh. Hunthar Venga lei tlahniam ṭhin chu sorkarin tihdam a tum tak tak thu leh DPR pawh sorkar laipuiin a tum tawh thu a sawi.

Zawh belhnate chhang­in Lalchamliana chuan, Ngaizel khama lung tla ṭhin chung­changah sorkar hmasain July 26, 2018-ah study team a siam tawh thu a sawi a, "Mahse, District Disaster Management Authority lam mite leh a huam chhunga tlawmngai pawlte an tel lo. Study team hian hmun pasarihah lung tla mai theia ngaih an hmu chhuak a ni. Project siam thei tur committee din rel a ni a, buaipui mek niin, DPR ṭha tak siam tum mek a ni," a ti.

DMR Minister chuan, Aizawl mai bakah, hmun danga khâm hrang hrang, hlauhawm bikte chu enfiah ṭha a tih thu sawiin, "Lui dung, mi tlak tamna laite pawh identify a, signboard tar ṭha kan ti. Thakthing tlang hnuai khâm (Mission Veng khàmphei) pawh UDPA department hotute nen la en chian a ṭhat ka ring," a ti a; Mualṭhuam North, Lunglei district-a leimin ṭhin enkawl nan Mitigation Fund aṭangin cheng nuai 386 hmuh a nih thu leh a bul ṭan nan cheng nuai 30 hman tum a nih thu a sawi.

MNF member C Lalmuanpuia zawhna chhangin Lalchamliana chuan, Hunthar Veng lei tlahniam ṭhin tihrehna tura detailed project report (DPR) chu sorkar laipuiin a pawm tawh thu a sawi a, "DPR hi May 2, 2019 khan National Disaster Management Authority-in min pawmpui tawh a, sanction a la chhuak lo a, sanction hmuh veleh hna ṭan a ni ang," a ti.

Lalchamliana chuan, Hunthar Veng lei tla­hniam enkawlna tura DPR siam, sorkar laipuiin a pawm tawh chu cheng vbc. 20 chuang hû a nih thu sawiin, "Cheng vbc. 15 chu Central tum tur a ni a, vbc. 5 chuang hret chu state sorkar tum tur a ni ang," a ti a; kum­in fûrpui atana inrálrin nan lei tawlhna ṭhin chu silpauline-a khuh mek a nih thu a sawi.