Horticulture College chungchang Chhân danah Duhoma a lawm lo

Nimina Assembly session-a zawhna leh chhanna hunah opposition leader Lalduhoma chuan session hmasaah Horticulture College chungchang a zawhna chhân a nih dan chu ṭha lo a tih thu a sawi chhuak. Chumi chungchangah chuan House leader Zoramthanga chuan, Horticulture College tura hna thawh mek dan sorkarin a hriat loh vang a nih thu a sawi.

Horticulture department kaihhnawiha MNF member Dr ZR Thiamsanga'n zawhna a siam kal zelah Lalduhoma chuan, session hmasa zawkah Thenzawla Horticulture tur siam mek chung­changah thil chi hrang hrang a zawh thu sawiin, "Min chhannaah, engmah kan hre lo, an ti a ni. A hmunah officer a awm reng a, a fel em em a, a hre em em a. Khatiang zawnga inchhan kha ṭha lo ka ti a, he House zah lohna pawh a niin ka hria," a ti. Horticulture College siam meka thlen tawh chin a zawt nghal.

Lalduhoma thusawi chungchangah Horticulture department enkawltu Zoramthanga, chief minister chuan, Horticulture College chu CAU, Imphal enkawl a nih avangin Mizoram sorkara engmah an hrilh loh thu a sawi a, "Horticulture College chungchang chhanna turah file a lo kal ṭhin a, officer-te pawh a hriat theih ang chin chin zawt turin ka ti a, a theih ang chin chin chhanna pawh an rawn dah. Kan enkawl a ni lo a, a chhanna pawh 'Kan hre lo' tih ngawt a fel lo. Contractor pawh zawt turin ka ti a, file ka thawn kir a ni," a ti.