Myanmar aṭanga bungraw lakluh aṭangin chhiah lak a ni ngai lo

Taxation minister Lalchamliana chuan nimin Assembly Session-ah official taka insumdawn tawnna a la awm loh avangin Myanmar aṭanga bungraw lo kalah chhiah lak a nih loh thu a sawi.

ZPM member C Lalsawivunga zawhna chhangin Taxation Minister chuan, "Official taka insumdawntawnna a la awm loh avangin Myanmar aṭanga bungraw lokalah chhiah lak a ni lo. Custom hoin Zokhawthar leh Seling-ahte fee an lo khawn ṭhin. Official-te chuan Custom hoin fee an lo la pawh hi dan ang tak chuan a dik lo tih min hrilh," a ti.

Lalchamliana chuan ZPM member pa­hnih Lalduhoma leh Dr Vanlalthlana zawhna inṭawm chhangin Mizoramah July 1, 2017 aṭangin Goods and Service Tax (GST) lak ṭan a nih thu a sawi.

Taxation Minister sawi danin, kum 2017 hma lama work order pek tawh, GST hman a nih hnua hna la zo lote hnen aṭangin Mizoram Goods and Services Tax Act, 2017-in a sawi angin GST hi lak a ni. GST hman hmain contract/work order pek chhuah nimah se, GST hman a nih hnuah chuan The Mizoram Goods and Service Tax Act, 2017-in a sawi angin chhiah hi lak tur a ni.