Central aṭangin tam leh zual Hnuh chhuah kan tum - CM

Vanlalhlana: Governor leh Chief Minister ngaih pawimawh a in ang lo lutuk hi a buaithlak.

Zodintluanga: Budget-a hmuh tur awmchhun chu mi harsate sàwr fû lehzualna tur lam hlir a ni.

Chief Minister chuan, SEDP chu hma-sawnna lam hawi a nih thu sawiin, "SEDP hmangin eizawnna dangah pawh tam tak kan kalpui dawn a, páwng theibawng sem ngawt a ni lo. A sem dan turah development oriented-in kan kal dawn. Engkim huap thei tura tih a ni. Kan budget hi duhthusama tam chu a ni lo, a kawihsapira hmangin tam lehzual hnuh chhuah kan tum," a ti.

Zoramthanga chuan, chhiah thar tam tham lak tum a ni lo tih sawiin, "Tax tihsan loh theih loh chu a awm ang. Power mante pawh a buaipuitu commission-in an tihsan a awm ang. Petrol-ah pawh India ramah a san avangin tax thar kan lak vang pawh ni loin a sang. Khawn ṭhat tâwk loh vanga hmuh loh vaibelchhe tam tak a awm," a ti a; a kim thei anga khawnin chhiah hmuh nasa taka a pun theih tur thu a sawi.

SEDP-a cheng vbc. 400 an dah chu a hmanna tur bik siam a ni lo tih sawiin CM Zorama chuan, "Kan untied fund ve ber a ni. A pawisaa sem chur chur a daih lo tih kan hria. Central aṭangin kan hnûk chhuak dawn a, chu atan chuan state matching share (SMS) a ngai. SMS atana kan inrina ber chu SEDP hi a ni a, chuvangin, a break-up siam nghal theih a ni lo," a ti.

ZPM Legislature Party leader Vanlalhlana chuan, Congress sorkar laiin Bhavan list leh MNF sorkar laiin Hnam Rûn list a lâr ṭhin tih sawiin, "Party office aṭangin Secretariat-ah recommendation a lut ṭhin a ni. Tunah chuan Chief Minister-in Serchhipah minister ho Hnam Rûnah hna dah khawm r'u a tih thu leh Pu Zawma'n a sem ṭhin thu a sawi a, hei hi thil thar a ni," a ti a; MNF kalphung chu party induhsakna uchuak a nih thu a sawi.

Vanlalhlana chuan, Governor leh CM ngaih pawimawh inang lo lutuk chu a buaithlak tih sawiin, "Governor chuan ei leh bara intodelh, kawng leh power generation a ngaih pawimawh ngawih ngawih thu a rawn sawi a nih kha. CM-in a budget speech-ah thil dang daih a ngaih pawimawh a rawn sawi leh si a ni," a ti.

Congress Legislature Party (CLP) leader Zodintluanga Ralte chuan, CM-in budget a pharh tâkah thil thar a awm loh thu sawiin, "Kan budget hi sawiho vak tur a awm lo, nikum nen a thu a ngai a, figure inthlak a ni deuh mai. Thil thar hmuh tur a awm lo a, thil thar beisei tur a awm lo," a ti a; budget-a hmuh tur awmchhun chu mi harsate sàwr fû lehzualna tur lam hlîr a nih thu a sawi.

Budget-a sorkarin a ngaih pawimawh zingah ram hmasawnna tur a váng tih sawiin CLP Leader chuan, "SEDP-ah vbc. 400 dah a ni a, a hmanna tur inziak a awm lo. Hna hrang hrang thawhna atan tih mai a ni. PWD-ah nge, a fachuam minister-ah a kal leh vek dawn, minister dangte'n hmuh an neih loh laiin sorkarin a ngaih pawimawh ber a hriat loh," a ti.