Myanmar aṭanga ráltlân chungchangah MHA ngaihchàn a ngai - Home Minister

Nimina Assembly session-ah Home minister Lalchamliana chuan, Myanmar buaina avanga Mizorama ráltlân awm mek leh awm zel thei chungchang a sawi a, "Ministry of Home Affairs (MHA) thu ngaichâng chunga kal a ngai ang," a ti.

Home Minister chuan, February 1, 2021 aṭangin Myanmar sipaite'n an chakna hmangin mipui thlan sorkar paihthlain, rorelna leh thuneihna an inpek thu sawiin, "Democracy palzûta sipaite'n thuneihna inpe chunga rorelna an kalpui mek avangin Myanmar ram chhung hmun hrang hrangah dodalna leh duh lohna mipuite'n an kalpui mek a, thi leh hliam eng emaw zat an awm tawh hi a pawi tak zet a ni," a ti a; Myanmar-ah boruak ṭha leh muanawm awm thuai se a duhawm thu a sawi.Myanmar ram dinhmunin a zir loh avangin Mizoram chhungah Myanmar aṭanga ráltlân rawn lut an awm ṭan thu sawiin Lalchamliana chuan, "Ram dang mi (foreigner) chungchang hi  chu central sorkar thu a nih avangin India sorkar thu ngaihchàn mek a ni. Chutih rualin, thuneitute thu pawh ngaichâng hman loa humanitarian crisis avanga Mizorama lo lutte chu an nihna leh ṭul dangte fel taka record in, a ṭul dan anga chhawmdawl an ni ang.

Chhawmdawl zel dan tur chu central sorkar kaihhruaina anga kalpui tur a ni," a ti.

India ramah Mizoram bak state dang pathum - Manipur, Nagaland leh Arunachal Pradesh chu Myanmar nena inri an nih thu sawiin, "India hian kum 1951 United Nations Refugee Convention leh he convention kaihruaitu 1967 Protocol-te hi a zawm (join) ve loh avangin, he convention leh protocol hian refugee chungchangah India a phuar lo," a ti a; Myanmar rama thil thleng avanga an awm zel dawn a nih chuan Myanmar nena inrî state-te chu MHA thu ngaichang chunga an kal a ngaih tur thu a sawi.