Governor Pillai-a'n Mamit a tlawh

Governor PS Sreedharan Pillai chuan nimin khan Mamit a tlawh a, DC conference hall-ah sorkar official, kohhran, khawtlang leh tlawmngai pawl hruaitute a kâwm.

Governor chuan, Mizorama kum khat leh a chanve a awm chhungin Mizo mipui thinlung ṭhatna a hmuh thu sawiin, "Khawtlang nuna inpawh tlànna leh thawhhonain Mizoram a tinuam a, a ram mipuite'n rim taka kan thawh a, hma kan lak chuan tun aia hlawhtlinna kan hmaah a awm a ni," a ti. 

Mamit district chu Mizorama Aspirational District awmchhun a nih angin, hmasawnna tam tak hmuh mek zel a nih thu sawiin Larsap chuan, "Mipui hriselna, zirna leh thil dang tam takah hmalakna kalpui a ni a, heng hmasawnnate hi mipui hnen a thlen a, a nihna tur ang taka hnathawh a nih zel theih nan district thuneitute leh khawtlang hruaitute'n uluk taka in vil a ṭul a ni," a ti a; khawtlang inrêlbâwlnaa a ṭha lo laite siamṭha a, vantlang thil enkawl leh humhalh kawngah ṭan la turin a chah.

PS Sreedharan Pillai chuan, Mamit district chu ramri hnaiha awm a nih bakah Bangladesh nena inrî a a nih avangin ram leh ram inkara thawhhona ṭha leh inpumkhatna a awm theih nan district official te, ramri hnaiha khaw awmte leh ramria duty BSF-te chu boruak ṭha siam zel turin a chah bawk.

Mizoramin ei leh bàr zawnnaah hmasawnna tur tam tak a neih thu sawiin Larsap chuan, "Kan ramah hian agriculture, horticulture leh tourism bakah thil dang tam takah hmasawnna tur a la awm a, nasa zawka hma kan lak a, state intodelh kan nih theih nan sorkar thuneitu te, khawtlang hruaitute leh tlawmngai pawlte'n ngaihtuahna sénga hma in lâk a pawimawh," a ti.

Governor chuan, Mamit district-in lung natna enkawlna ṭha a nei lo chu pawi a tih thu leh hmalak thuai ni se a duh thu a sawi bawk.

Mamit DC Dr Lalrozama tarlan danin, Mamit district-ah hian kum 2011 chhiarpuiah mi 86,364 an awm a, VC 90 awmin, khua 78 leh sub-village 10 a awm. Chhungkua 17,731 an awm a, sex ratio chu 927 (mipa 1,000-ah hmeichhia 927) niin, literacy rate chu 84.74% a ni. Aspirational district programme hnuaiah kum 2019-20 chhungin cheng nuai 900 an dawng tawh a ni.