Finfiahna puang turin ZPM VP phût

MNF party chuan thuchhuah siamin, MNF kaihhruai sorkarin Serchhip biala Assembly by-election puan a tihkhawtlai dan finfiahna a neih chuan mipui hmuha pho chhuak vat turin ZPM vice president K Sapdanga an phût.

MNF chuan, ZPM Vice President-in March 5, 2021-a Serchhipa press conference a neihnaah, Serchhip biala by-election neih turah Mizoram sorkar a la inpeih loh thu Election Commission-ah Mizoram sorkarin a thlen nia an hriat thu a sawi tih an tarlang a; sorkar tihhmingchhiat tumna a nih thu leh ngawihbopui mai chia an ngai loh thu an sawi.

ZPM Vice President-in 'Kan chhui chiang mek' tia a sawi thu tarlangin MNF chuan, "Thu belhchian dâwl lo sawia ṭawng mai mai lo tura ngaih Pu K Sapdanga hian a thu thehdarh hi ziakin emaw awkáa lo zuk sawi an awm emaw a nih pawhin, thu dik a nih leh nih loh finfiahna a neih chu mipui hmuhah rawn pho chhuak vat rawh se, a nih loh chuan dâwt thu puarpawléng mai mai aupui a nih chuan sim tawh se la, sawi zui tawh suh se," an ti.

Inthlan puan chu state thuneihna a ni lo tih sawiin MNF chuan, "Election Commission thuneihna a ni a, state sorkarin inthlan hun tur a duh hun huna a nawr ngawt theih a ni lo," an ti a; Serchhip by-election neih hun tur tihfel a la ni lo a, sorkarin sawi theih a nei loh thu an tarlang.

MNF pary chuan, MLA aṭanga Lalduhoma bàn a ni chu Lalduhoma hremna mai ni loin, Serchhip bial mipui hremna a ni, tia K Sapdanga'n a sawi chu chhángin, "Pu Duhoma hi vawi eng emaw zat ti tawh lo tur leh dan bawhchhiatna a ni tih hrilh a nih hnu pawha dan a bawhchhiat luih zel avangin amah leh amah a inbàntir a ni ber zawk," an ti a; mi dang mawh ni loin, Lalduhoma mawh niin an tarlang a ni.