Sum kan sem dawn lo - ZPM V.President

ZPM vice president K Sapdanga chuan, Serchhip biala Assembly by-election neih tur chu kalphung thar duhtute leh kalphung hlui duhtute inbeihna a nih thu leh, inthlan dawnah sum an sem ve dawn loh thu a sawi.

Nimina ZPM party pisaa inkhawmah thu sawiin K Sapdanga chuan, "Serchhip biala by-election neih tur hi kalphung thar duhtute leh kalphung hlui duhtute inbeihna a ni a, candidate-te hi chu party symbol mai an ni. Pu Lalduhoma hi tling lo palh ta se, ZPM a chak lo tihna a ni a, tling ta se, ZPM a chak tihna a ni ang," a ti.

ZPM Vice President chuan, an khingpuite hmanraw hman thiam ber chu vote thlak dawn hnaia sum sem a ni leh dawn tih a sawi a, "Sum sem hian Mizoram politics leh mipui rilru a tichhia. Sem tur nei pawh ni ila kan sem ve lo ang. Sum sema vote zawn hi dan kalh, mi rilru tihchhiatna a nih avangin a rûka sem tum an awm chuan a rûkin kan do ang a, a langa sem tum an awm chuan a langin kan do dawn a ni," tiin a sawi.

K Sapdanga chuan, Serchhip bialah kum 2018 inthlan ṭumin INC candidate leh chief minister ni lai Lal Thanhawla chu Lalduhoma'n vote 400 chuangin a hneh a, MNF candidate chu vote 1,000 chuangin a hneh tih a sawi a, "Khatih hun lai ai khan tunah hian khawngaihtu kan ngah zawk a, vote tam zawk kan hmuh a rinawm," a ti.

ZPM president mawhphurhna la mektu K Sapdanga chuan, by-election-a ZPM candidate tur Lalduhoma chu a thawk rim hle tih sawiin, "Kan hotupa hi a thawkrim em em a, a chhuanawm tak zet. Kan block leh unit hruaitute pawhin an ṭawiawm ṭha hle," a ti a; an hotupa thawh rimna chhâwk zângkhai dan kawng tam tak a awm a, chu chu Campaign Committee-in an la rêl dawn tih sawiin, lo ngaichâng turin an party mite a chah a ni.