International Women's Day hman a ni

International Women's Day hi Krishi Vigyan Kendra (KVK), Kolasib chuan an hmunah an hmang a; KVK senior scientist & head Dr Michelle C Lallawmkimi'n hmeichhiate fuihna thu a sawi a, national award dawng tawh (Best Performing Self Help Group-2018 and 2019) Vau Self Help Group hnenah chawimawina hlan a ni.

International Women's Day hmannaah hian Kolasib KVK chuan kal khawmte pualin lemziak leh thuziaka inelna (drawing competition & essay writing competition) an buatsaih a; Vau SHG tan Handicrafted Chain Making for Income Generation training an buatsaih bawk.

KVK, Khawzawl pawhin International Women's Day KVK Training Hall-ah an hmang a; thupui atan 'Women leadership in agriculture, entrepreneurship, equity & empowerment’ tih an hmang. KVK senior scientist & head Dr Henry Saplalrinliana'n thupui a sawi a, Covid hripui léng kara hmeichhiate'n hma an lak theihna leh an ṭangkai theihna tur chi hrang hrang a sawi.

Khawzawla Women's Day hmannaah hian KVK chuan Doubling Farmers Income 2022 kaltlanga an enkawl mek - Tualte leh Tuipui khuaa self help group hmeichhiate chu tomato sauce leh hand sanitizer siam dante leh hmai tuamna ṭhui dan an zirtir a ni.

International Women’s Day pual hian Mizoram Christian College, Aizawl chuan nimin khan an hmun - Synod Higher Secondary School campus-ah inkhawm an buatsaih a, Mizoram University-a College Development Council director Prof. Lalbiakdiki Hnamte leh Synod HSS principal Zirkungi ten an hmanpui.

North Khawbung community hall-ah pawh One Stop Centre (OSC), Champhai buatsaihin International Women's Day hman a ni a, MHIP member-te leh sikul naupangte tan hmeichhiate dikna leh chanvo chungchang inzirtirna hun hman a ni.

BJP, Mizoram Pradesh hnuaia hmeichhe pawl, Mahila Morcha pawhin BJP pisaah International Women's Day pualin hun an hmang a; Women & Child Development hnuaia Poshan Abhiyaan consultant Lalrinkimi'n thu a sawi. He ni pual hian BJP Mahila Morcha hruaitute chuan Civil Hospital, Aizawla nau neihna ward-ah diaper leh wipes an sem bawk.

(Boby thlalak - KVK, Kolasib-in lemziak leh thuziaka inelna an buatsaih)