COVID-19: Mizoram dinhmun Enkawl lai mi 6 chiah an awm

March 7, Pathianni khan Mizoramah swab sample 267 endik ni mah se, Covid-19 vei hmuh chhuah a ni lo a, a záwnin ni thum chhung hripui vei hmuh chhuah a ni tawh lo. Nimin khan hripui laka fihlim tawh mi pahnih, Aizawl district-a mite chhuahtir an ni a, enkawl lai mi paruk chiah an awm.

Pathianni khan ZMC laboratory-ah mi pakhat swab sample endik a ni a, RAT hmangin district pasarihah sample 266 endik a ni bawk a; TrueNAT-PCR hmangin sample endik a awm lo thung.

Mizoramah Covid-19 vei mi 4,428 hmuh chhuah a ni tawh a, mipa 3,230 leh hmeichhia 1,198 an ni. Nimin tlai dar 5 thleng khan mi 4,412 (99.64%) chhuahtir an ni tawh a, mi 10 (0.23%) thi tawhin, enkawl mek mi paruk (0.13%) an awm.

March 7, 2021 thlenga Mizorama swab sample endik tawh zat chu 2,37,957 a ni a, chu'ng aṭanga Covid-19 positive hmuh tawh zat 4,428 chu 1.86% a ni.

Hripui vei hmuh tawh zinga mi 2,112 chu Mizoram chhunga kái chhâwng an ni a, mi 2,316 chu Mizoram páwn aṭanga an rawn luh hnua hmuh chhuah an ni thung.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni. ZMC-ah hian Covid-19 positive 2,653 hmuh chhuah a ni tawh a, TrueNAT-PCR hmangin 673 leh RAT hmangin 1,101 hmuh chhuah a ni tawh.

Tun dinhmunah hripui vei enkawl mekte chu tualchhung mi vek an ni a; Mizorama district 11 zinga pasarih - Lunglei, Siaha, Kolasib, Serchhip, Lawngtlai, Khawzawl leh Hnahthial district-ahte Covid-19 vei an awm tawh rih lo.