Kum 2019 aṭangin mau chîn nan Cheng vbc. 2.72 sên a ni tawh

Horticulture changtu chief minister Zoramthanga chuan nimina Assembly session-ah INC member Zodintluanga Ralte zawhna chhángin, Horticulture department-in kum 2019 aṭangin mau chìnna atan cheng vbc. 2.72 a sèn tawh thu House a hrilh a, "Chhungkaw 213-in an chíng tawh," a ti.

Zodintluanga Ralte chuan, Mizoram khawchhak lamah mau a tam lo a nih pawhin, khawthlang lamah chuan a mual a mualin mau a awm thu sawiin, "Kan tualṭo maute a ṭhatzia chu khaw tam takah mau hmun an vât a, an hâl rêm a ni. A kum lehah chuan a ṭo khat leh vek. Kan tualṭo maute hi kan tawlh chhuak ruih ruih a, a demand a sang hle," a ti a; sum tam tak sênga kûi ṭiah leh hardening-te ngai loa tualṭo maute hman ṭangkai theih a nih leh nih loh a zawt a ni.

Chief Minister chuan, tualṭo mau chungchang chu sorkar, department leh industry neitute'n theihtawpin an ngaihtuah tih sawiin, "Kan tualṭo maute hi luikamahte an awm a, a lâk chhuahna a hautak a ni. Sumdawn tak takna atan chuan a hlâwk loa, a hautak lutuk. Kan maute hi a ṭha teh meuh mai. Tuna kan raw buaipui hi chu pum khat mi pahnihin an pu zo lo a, nuamsa deuha pu tur chuan pathum nih a ngai. Kan ram mau nen chuan a inhlâwk hleih a ni," a ti.

Mizorama bamboo industry-te chu an kháwl a chhiat vang ni loin, raw material an hmuh loh avangin an châwl ṭhup nia sawiin Zoramthanga chuan, "Kan raw neihte hi kum 40 danahte a rah a, a chìn tur nei turin hun a duh rei dawn lutuk. Jaikantia hi a lian a, mahse tissue culture siam thiam an awm lo. Latiflorus leh Brandisii hi tissue culture siam thiam an awm a ni. Tuna kan tih dan lo hi chu kawng dang a awm lo," a ti a; raw chi siam chhuahte chu mimalin an rama an chìn tur a nih thu a sawi.

Zodintluanga leh ZPM member Dr Vanlalthlana ten Bairabi-ah mau hardening tihna a awm thu sawi chhuakin, department-in a hriatpui leh pui loh an zawt a ni. Chief Minister chuan, Lengteah ringawt hardening tih sèn chi a ni lo nia sawiin, "A 100 tél ti an awm a ngai, a nih loh chuan mipuiin chìn khawp an hmuh loh a hlauhawm. Tender koh a nih hunah, hralh tur nei apiangin an chháng ang a, tih tlakte chu leisak an ni ang. A ti zawng zawng pawh leisak ila, a daih lo nasa dawn," a ti.

Dr Vanlalthlana'n National Bamboo Mission hnuaiah mau nursery chu duh duha neih ngawt theih a nih loh thu a sawi chhuah chungchangah Zoramthanga chuan, "Department tih a ni lo. Mimal vekin an tih a ni a, sorkarin a tihsak a ni lo. Chuvangin, hriatpui vek chi a ni lo. Mimal sumdawnna vek a ni. Growmore Biotech pawhin a inthawnna lamah a thi a tam avangin Mizoramah hmun rawn bun an duh," a ti a, mau hardening chu nasa taka kalpui zel an duh thu a sawi.

Chief Minister chuan INC member Lalrindika Ralte zawhna chhangin, kum 2020-21 atan Horticulture department-in raw ṭiak 84,000 a lei thu a sawi a, "Raw ṭiak 84,000 leina atan cheng nuai 67.20 sên a ni. A supply-tu chu Growmore Biotech Ltd., Tamil Nadu a ni a, a la luttu chu Pi F Lalhriatpuii, local distributor of Growmore Biotech a ni. Kum 2020-21 ah Hmunpui leh Lengpui ramah chìn a ni a, 2020-22 ah Saiphai zau leh Hmunpui ramah chìn tura ruahman a ni," a ti.