Delhi tlawn ngai lo turin a theih chinah Intodelh kan tum dawn - Chief Minister

Chief minister Zoramthanga chuan, Mizoram thil neih hlu ber chu ram a nih thu sawiin, "Hemi hmang ṭangkai hian Delhi lam tlawn reng ngai lo turin a theih chin china intodelh kan tum a, chumi tur chuan Socio Economic Development Programme (SEDP) hmanga ṭan lak a ni dawn," a ti.

June 13, 2019-a pharh tâk, kum 2019-2020 chhunga Mizoram budget nimina sawihona tlang a kawmnaah Chief Minister chuan, "MNF kaihhruai sorkar tharin tun hi budget puitling a pharh vawi khatna a ni chungin, mi dang pawhin puitling an tih ka ring. Budget hrim hrim hi a sawichhe duh tan sawichhiat theih tak a nih laiin, fak duh tan pawh fak mawi theih a ni," a ti a; India rama awm nih chhung chuan kal dan pangngaia awm sa zawm reng a ngaih thu a sawi.

Zoramthanga chuan, state sorkarin sum hmuhna kawngah central aṭanga a dawn tur leh mahnia thawh chhuah lak khawm aṭanga tum ve tur a awm tih a sawi a, "Hei hi an lak khawm tam poh leh an vannei mai dawn a ni. Budget kalphungah, tun hma chuan plan leh non-plan awmin ruahmanna hran siam a ni ṭhin a, tunah erawh chuan kaihkawp vek a ni tawh. Kan sorkar hmasaka budget kan lo pharh ve tawhte nena khaikhin chuan tuna mi hi chu a ropui tawh hle a ni," a ti.

Sorkarin a tum ber chu state sorkar sum thawh chhuah - Gross State Domestic Product (GSDP) leh mimal sum thawh chhuah - per capita income tihpun a nih thu sawiin CM Zorama chuan, "Hemi hlen chhuak tur hian sorkar flagship programme SEDP hmanga ṭan lak a ni dawn," a ti a; mi tin thawh chhuah a pun theih nan an mamawh ngaihtuahsakin, a ṭul anga hmalakpui a nih dawn thu a sawi.

Budget pharh tâka state sorkar sum thawh chhuah tur, state's own tax renenue tihpun tum, mi ṭhenkhatin chhiah lak sa ṭhenkhat tihtawp a ni chunga tihpun a nih an hriatthiam loh thu an sawi chu thil âwm tak a nih thu sawiin, "Chhiah aṭanga sum lak luh tipung tur hian tui, êng leh bill dangte ṭhahnemngai zawka khawn tum a ni. Hei hi hlawhtling taka kalpui theih beisei a ni," a ti.

SEDP bul ṭan nan cheng vbc. 750 dah a nih piah lamah, SEDP hming pu ve chiah loa sum an dahte nen chuan SEDP-ah hian cheng vbc. 1,000 vel awm tura ngaih a nih thu sawiin Chief Minister chuan, "Central lamah hman sên loh khawp sum tam tak a awm a, chumi hai chhuak tur chuan ṭan lak a ni ang. Tuna budget kan pharh hi chu a chî tur chauh a ni a, a dikna a lang zel dawn a ni," a ti. Ei leh bara intodelh tura ṭan an lak piah lamah, hmasawnna ruhrel din kawngah pawh nasa taka hmalak tum a nih thu a sawi bawk.