Doctor pension hun pawhseiah Hmalak mek a ni - Health Minister

Health & Family Welfare minister Dr R Lalthangliana chuan, sorkar hnuaia thawk doctor-te pension hun chungchangah hmalak mek a nih thu MNF member Dr ZR Thiamsanga zawhna chhangin Assembly House a hrilh.

Dr ZR Thiamsanga chuan, BJP sorkarin kum 2016 aṭangin doctor-te pension hun atan kum 65 a puan thu sawiin, "State tam takin an hmang tawh a, ṭhenkhat chuan doctor pension hun atan kum 65 leh kum 67-te an ti hlawm. Mizoramah phei chuan doctor indaih lohna a nasa a, specialist phei chu kan indaih lo zual," a ti.

Aizawl Civil Hospital-a doctor tam tak chu nak-kum lawka pension turte an nih thu sawiin ZR Thiamsanga chuan, "Doctor pension hun hi kum 62 tal tih a nih loh chuan kan la buai a hlauhawm," a ti a, doctor pension hun pawhsei tum a nih leh nih loh a zawt a ni.

Health Minister chuan, doctor pension hun pawhsei chu ngaihtuahna sên ngai tak a nih thu sawiin, "Pawhsei duh lêm lote pawh an awm tho. Department-in hma a la chho mek a ni," a ti a; doctor pension pawhsei chu thil lian tham a nih avangin Cabinet-ah pharh a ngaih tur thu a sawi.