MHIP Gen.Hqrs. leh OB-te suspend a ni Official seal-te Court-a thehlut tura tih an ni

Aizawl District Court chuan MHIP General Headquarters chu a titawp (suspend) a; office bearer-te pawh MHIP General Headquarters hminga thil tih tawh lo tur leh, office bearer seal zawng zawng a rang thei ang bera Court-a thehlut turin a hriattir.

MHIP Gen.Hqrs. leh office bearer-te chungchangah hian Aizawl District Court-a Senior Civil Judge-III R Malsawmdawngzuala chuan June 17, 2019 khan order a tichhuak. Order chuan, MHIP Gen.Hqrs. office bearer term chu April 2019-ah a tawp tawh thu tarlangin, "Chutih laiin, MHIP Gen.Hqrs. hian OB term a tawp hnuah NGO dangte hnenah sum a sem tih information rinawm tak dawn a ni," a ti.

Cour order chuan, MHIP Gen.Hqrs. office bearer thar thlan a nih hma chuan MHIP Gen.Hqrs. chu tihtawp (suspend) rih turah Court-in a ngai tih a tarlang a, "Chuvangin, MHIP Gen. Hqrs. chu ka suspend a, office bearer-te pawh MHIP Gen.Hqrs. hminga thil engmah ti lo turin ka hriattir a, official seal zawng zawng a rang thei ang berin Court-a thehlut tura hriattir an ni bawk," a ti a; Court order chu chhuah a nih aṭangin order dang a awm leh hma zawng a nun tur thu a tarlang bawk.

MHIP Gen.Hqrs. hian kumin April 16 leh 17 khan Vanapa Hall-ah General Conference an hmang a, April 17 hi kum 2019-2021 chhunga office bearer turte thlan hun tura ruat a ni. Mahse, inthlan tur chungchangah Court-ah thubuai thehluh a awm avangin, Aizawl District Court chuan April 16, 2019 khan order tichhuakin, MHIP chu inthlang rih lo turin a hriattir. Tun thlengin MHIP Gen.Hqrs office bearer tur thlan a ni ta lo a ni.