KHAWTHLIR

Health minister Dr R Lalthangliana chuan ZPM member Lal-chhuanthanga zawhna chhangin, MIMER hming Zoram Medical College tia thlâk a nih avangin chuti taka ṭhat zawkna leh hlâwkna a neih sawi tur a awm lem rih loh thu Assembly House a hrilh.

Phulpui Branch YMA chuan kumina YMA Day pualin nimin khan an khaw community hall-ah blood donation camp an huaihawt a, Aizawl Civil Hospital tan thisen unit 56 an pe a, a petute mipa 51 leh hmeichhia panga an ni.ṭ

Aizawl City Traffic Warden Scheme, 2017 hnuaia traffic warden 18  training chhuakte hnenah nimin khan Traffic SP Rodingliana Chawngthuin enlistment certifcate a hlan. Traffic warden-te hi traffic manage­ment buaipui turin engtik lai pawhin pawl emaw, mimal emaw ten man chawiin an chhawr thei dawn a ni.

Sports & Youth Services minister Robert Romawia Royte chuan MNF member Lalrin-tluanga Sailo zawhna chhangin, Aizawl khawpui, AMC area chhungah football stadium sak tumna a awm thu  Assembly House a hrilh.

Mizoram State Planning Board vice chairman thar H Rammawi chuan nimin khan a pisa thar a luah ṭan a; office luah ṭan pualin Pathian hnena inhlanna inkhawm buatsaih a ni. H Rammawi chuan, "MLA-ah ṭum nga lai thlan tlin ka lo ni ve tawh a, minister pawh ka lo ni ve tawh. Tunah hetiang dinhmuna ka'n ding leh ta hi ka lawm hle a ni," a ti.

ZPM member VL Zaithanzama zawhna ziaka chhangin chief minister Zoramthanga chuan, June 12, 2018-a Council of Minister ṭhukhawm chuan Lung-lei, Champhai, Kolasib, Serchhip leh Mamitahte adhoc municipality din a thuphungin a pawm a; chumi bawhzui nan chuan hmalak mek zel a nih thu a tarlang a, “Finance department-ah pawh sum mamawh tur dilna August 6, 2018-ah thehluh a ni tawh,” a ti.