Leiba tam vangin a luhai thlak hle - Tourism Minister

Tourism minister Robert Romawia Royte chuan, Tourism department a chan tirhin leibá cheng nuai 4000 chuang an neih thu leh a luhai thlak hle thu a sawi.

MNF member ZR Thiamsanga zawhna leh zawh belhnate chhangin Tourism Minister chuan, Product Infrastructure Development for Destination Circuit (PIDDC) tihtawp a nih avangin Tourism department-in leibá cheng nuai 4000 chuang an neih thu a sawi a, "He project hnuaia hnathawhah hian ṭhenkhat chuan 30%, 20% leh a aia tamte an zo tawh a ni," a ti.

Robert Romawia chuan, contractor-te hnena an bat rulh a nih theihna atan theihtawp an chhuah thu sawiin, "Minister ka nih tirh khan Central-a department hotute ka dawr a, mahse, Tourism Minister aṭang chuan PIDDC project hi a tawp tawh avangin sum hmuh a beiseiawm loh," a ti a; DoNER leh NEC hotute pawh an dàwr tawh thu a sawi.

Tourism Minister sawi danin, March 29, 2019 khan NEC aṭangin cheng nuai 273 hmuh a ni a, chu chu PIDDC hnuaia hnathawh physical progress san zualnate pek a ni dawn. Chaltlanga Tourist Lodge leh Durtlang inkara ropeway siam mek chu zawh a la nih loh thu sawiin Robert Romawia chuan, "Tunah hian hna chawlh rih a ni a, zawh hun tur hriat theih a ni lo. Ropeway kalkawng turah harsatna a awm a, chinfel a nih loh chuan chhunzawm theih a ni lo. Tun sorkar hian heng harsatna awmte hi chinfel a tum mek a ni," a ti.

Tourism Minister sawi danin, Chaltlang to Durtlang Ropeway siam nan Tourism Ministry-in cheng nuai 2482.58 a sanction a, mahse a kawngah high tension electric wire pali a awm avangin sorkar hmasa hunlai khan chawlhsan tawh a ni. Hmuifanga suan rawtna pawh sorkar hmasa hunlai khan Ministry of Tourism chuan ziakin a pawm loh thu Mizorama Tourism department a lo hrilh tawh a ni.

Robert Romawia chuan an sorkar tirh aṭangin sorkar hmasa hunlaia lo chawlhsan tawh ropeway project tihnun tumin ṭan an lak thu sawiin, "Union Tourism Minister te,Union Power Secretary te pawh keimah ngeiin ka zu hmu a, a hmun sawn thlengin ka rawt a ni," a ti.