Khanpui khuain kuminah sawhthing Cheng nuai 900-1000 man an hralh

Mizorama sawhthing hralh tam khua zinga mi Khanpuiah chuan sawhthing ching chhung­kua 270 vel an awm a; kuminah tun June thla thlengin sawhthing an hralhna aṭangin cheng nuai 900-1,000 inkar an la lut tawh.

Khanpui khuaah hian Hriangtlâng Zau Sawhthing Ching Asso­ciation a ding a, an chair­man K Lalruata chuan, sawhthing chìnna hmun pahnihah an nei tih a sawi. An khaw ṭhalaite'n hna an thawk nasa a, an khaw chhungah in leh lo, zirna lam leh bungrua ṭha neih kawngah hma an sawn phah hle thu leh, kuminah pawh sawhthing hralh tam zualte chuan cheng nuai 50 mante an hralh thu Vanglaini palai a hrilh.

K Lalruata chuan, sawhthing chu kuminah Hriangtlâng zauah chhungkua 170 velin an chin thu leh khaw bul hnaiah chhungkua 200 velin an chin bawk thu a sawi a, "Hriangtlâng zauah quintal 12,000 vel an thar a, chhinchhiah fel la ni lo mah se, khaw bul hnaiah qtl. 10,000 vel an thara ngaih a ni," a ti a; Hriangtlang zau lam an chhinchhiah dan leh khaw chhunga sakawra phurtuin a chhinchhiah danin, kuminah June thla thlengin cheng nuai 900-1,000 vel man an hralh tawha an chhût thu a sawi.

Hriangtlang zaua tharte'n a tirah chuan commission kaltlangin an hralh a, kg. khat Rs. 31-in an hralh. Sawhthing a tam avangin a chíngtu pawl chuan March 15, 2019 aṭangin tender-in an ti a, commission an titawp. Tender chhangtu chu Saitual khaw mi a ni a, kg. khat Rs. 40-in a chháng. Tender hnua a leitute'n pawisa an ngah tâwk loh avang leh sawhthing hralh tur a tam tâk zel avangin tender loin, Bagha vai leh Bangladesh, Tripura leh mi dangte an ko chhuak a; an rate a inang tlangpui.

Ni khatah a tam lai berin truck lian phur (trip) riat an hralh ṭhin. A tam berin kg. khat Rs. 40- 50 inkarin an hralh a, Rs. 60 a kai zauh cháng pawh a awm. K Lalruata chuan, Khanpui khuaa sawhthing hralh tam ber chu Nirbahadur (a nu Mizo) a nih thu sawiin, "Chhinchhiah fel thlap a la nih loh avangin quintal 600 vel a tharah kan ngai. Quintal 400-500 vel thar pawh an awm nual a, a náwlpuiin qtl. 100 vel an thar a, hmeithaite pawhin cheng nuai khat lei lo an awm loah kan chhût," a ti.

Khanpui ṭhalaite'n hna an thawk nasa tih sawiin K Lalruata chuan, "Chhuan tlak khawpin hna an thawk nasa. Hriangtlâng zau hi khua aṭangin mél 17 vela hlá a ni a, thla hnih/thumte an riak a, chawlhni vawi 20 chámte pawh an awm. Intodelh tumin hna an thawk a, sorkar aṭanga thil sem vel pawh an ngaihtuah lo, 'Kan thawk ang a, kan nei mai dawn alawm,' tih hi an ngaihdan a ni a, an nei ta mai reng a ni," a ti a; sawhthingin an khawsak phung a chawi kân nasat thu a sawi.

K Lalruata chuan, sorkar department-te lakah an vui ve ṭhin tih sawiin, "Mizoramah sawhthing kan thar tam berin kan ring a, min pui âwm department kan zawt ṭhin. Agriculture kan zawt a, 'Horticulture chan in ni' min ti a, Horticulture kan pun a, min ngaihsak lo a, kan vui ve a ni," a ti. Chutih rualin, kum 2017-ah Agriculture Joint Director-in a tlawh thu te, thlai leh sawhthing an phurhna tur kawng laih nan Rs. 1,00,000 an hmuh thu a sawi bawk.