Electoral roll ennawn dan thlirho

Nimin khan Kolasib DC Conference Hall-ah Electoral Roll observer Lalthangpuia hoin Kolasib district electoral roll ennawn meka hna thawh dante thlirho a, a kaihhnawih sorkar mi pawimawhte bakah, political party leh tlawmngai pawl hrang hrang aiawhte an tel.

Thlirhona hi election officer Vanlalchhuanawma Chawngthu-in a kaihruai a, district election officer (DEO) Sangchhin Chinzah, bawrhsapin inlawmna thu a sawi. Observer Lalthangpuia chuan, electoral roll ennawn chu January 15, 2020-ah tihchhuah hman tur a nih thu sawiin, hun tiama peih hman a nih theih nan thihna vang leh pêm vangtea paih ngai leh kum 18 tling thar ziah luh ngaite chu tifel hman vek turin thawktute a chah.DEO Sangchhin Chinzah chuan, electoral roll ennawn leh siamṭhat kalpui mekah hian khawtlang leh tlawmngai pawl hrang hranga hruaitute an pawimawh thu sawiin, ṭha taka thawhho zel a duh thu a sawi.

Electoral roll siamṭhatna atana draft electoral roll tihchhuahah Kolasib district-ah hian voter 58,794 an awm a, mipa 28,577 leh hmeichhia 30,219 an ni a, mipa aiin hmeichhia 1,642-in an tam. Kum 2011 chhiarpuiah Kolasib district-ah mi 83,955 an awm a, draft roll ang chuan district pum mipui aṭangin mi 70.03%-in vote an nei tihna a ni. Kolasib district-ah hian polling station panga siam belh a ni a, chu'ngte nen chuan district pumah polling station 87 a awm dawn ta a ni.