Minister-in MVSA khawmpui hmanpui

Mizoram Veterinary Service Association chuan February 26, Nilaini khan Selesih Artificial Insemination Training Institute-ah khawmpui an hmang a, AH&Vety minister Dr K Beichhua'n a hmanpui.

Dr K Beichhua chuan MVSA member-te chu an hna thawhah hlawhtling ngei tura ṭan la tura fuih­in, "Vety department-in Mizoram tan goal tam tak a thun theih nan in striker (Vety Minister) hi ball a tam thei ang ber min siamsak a pawimawh," a ti. 

AH & Vety Minister chuan Mizoram sorkar hnuaia service hrang hrangte chu in mamawh tawn vek an nih thu sawiin, "Mahni service chhuanpui thama hnathawh a pawimawh. Tun dinhmunah Mizoramin sa a mamawh 36% chauh Mizoramin a thawk chhuak," a ti a, sa mamawh 50% tal thawh chhuah a nih theihna atan ṭan la turin a fuih.

Khualzahawm AH & Vety Board vice chairman C Lalmuanpuia pawhin thu sawiin, MVSA member-te chu SEDP hnuaiah ṭhahnemngai taka thawk turin a ngen.

Conference-ah hian kum 2020-2021 chhunga MVSA hruaitu tur atan president-ah Dr C Lalrintluanga, general secretary Dr V Lalzarzova leh treasurer Dr M Zohming­thangi-te an thlang.