Rohingya hmeichhe 8 man

Champhai district-a Dungtlang police outpost-a duty police-te chuan June 17, Thawhṭanni chawhma dar 10 vel khan Leithum leh Aizawl inkarah tlan maxicab MZ-01 K-4816 aṭangin Rohingya Muslim nia hriat hmeichhia pariat an man.

Thu dawn danin, Rohingya Muslim hmeichhia an manna maxicab hi H Lalzawmmawia, Leithum khalh a ni a, hmeichiate chu Saikhumphai thleng phur tura tih niin, Saikhumphaiah Myanmar lam miin an lo hmuak dawn a ni.

Rohingya Muslim hmeichhia an mante chu - Asma (14) d/o Abdul Hussain, Fatama (14) d/o Mahamusidi, Royada (11) d/o MamaToid, Sadiya (11) d/o Amid Hussain, Mabiya (12) d/o Mamu Salim, Yasmin (14) d/o Numa Mat, Rasheda (13) d/o Mohamed Sultan leh, Taslima te an ni a; an vai hian Kotofalon Rohingya Musim camp, Bangladesh aṭanga hruai an ni.

Rohingya hmeichhiate chu Champhai Police Station panpui an ni a, an zinga pakhat, Taslima erawh chu Dungtlanga an awm laiin a tlan bo a, mi dang zawng chu nimin zing dar 2 vel khan Champhai PS thlenpui an ni. Champhai PS-ah hian IPC Section 370(3)(4)(5) hmangin thubuai an ziak lut.

Saikhumphaia hmeichhiate lo dawngtu turte pawh police-te chuan an man a, Nguntindawng (25) s/o Thabuantai, Tahan G Group leh Jonathan (23) s/o Thathawmlian, Khawthlir, Myanmar-te an ni. An pahnih hian Champhai panpui an nih mek laiin Khuangleng bulah police motor aṭangin an tlan chhuak a, an tlanbo nghal.