Thawk ṭha lo company-te hrem turin Huaisen ngam turah kan inngai - CM

Nimina Assembly session-ah chief minister Zoramthanga chuan, hna thawk ṭha lo company/contractor-te hrem kawngah huaisen ngam tura an inngaih thu a sawi.

Opposition leader Lalduhoma, ZPM member chuan kawng siam chungchangah sorkar tharah beiseina sang tak an neih thu sawiin, "Serkhan-Bagha road-ahte kawng siam hna ṭha tâwk lo a thleng leh si. Sorkar hi kan ngaihven reng a, mipui nen kan thlir che u. Company-te nen kan inhrethiam leh mai ang tih a hlauhawm. Khauh takin sorkar kal se, kan ṭawiawm tlat ang," a ti.

Zoramthanga chuan, an sorkar hmasak pawhin World Bank kawng siamnaah company pakhat chu an bàn tih sawiin, "Inremna anga ti ṭha lote huaisen taka khawih ngam a pawimawh. Huaisen taka kal ngam turah kan inngai," a ti a, huaisen taka hma la tura an ṭan dawn thu a sawi.

Chief Minister sawi danin, hna thawk ṭha lo contractor bân turin a hma aṭanga inbuatsaih lâwk a ngai a; inbuatsaihna ṭha a awm loh chuan contractor-te chu court-ah an kal a, a hma aia buai zawkin, hna thawk thei loin a awm theih a ni. MNF sorkar hmasaka contractor an bàn ṭum pawhin an inbuatsaih lâwk vek a, court-ah kal mah se, harsatna a thleng lo.

Kawng siam chungchanga harsatna awm sawiin CM Zorama chuan, "Delhi lam aṭangin cheng vaibelchhe têlin an rawn sanction a, Mizo contractor-te'n an chháng thei lo. Chuvangin, vai hoin an chang a, hna an thawk ṭha thei lo. Kan contractor-te pawhin kháwl an neih ṭhat a, vai ruai loa Mizo rawih theihna atan theihtawp chhuahin hma kan la dawn," a ti.

MNF member Dr Vanlalṭanpuia zawhna chhangin PWD changtu Chief Minister chuan, "DPR siamṭha tura hmalak a ni a, survey mek a ni. Estimate zat tur a la hriat loh. Tun dinhmunah hemi atan hian cheng nuai 900 dah a ni," a ti a, kum 2019-2020 chhunga hna thawh ṭan hman beisei a nih thu a sawi.MNF member Dr K Pachhunga zawhna Chief Minister-in a chhan danin, Mizoramah sorkar thar a pian hnu, December 2018 chawhnu lam aṭanga May 2019 tàwp thlengin Mizoramah kawngpui km. 225 blacktop a ni tawh a, km. 403.35-a thui blacktop tawh sa thawm ṭhat a ni a, pot hole leh patch repair km. 522.45-a thuiah thawh a ni tawh.