Excise-te'n ruihhlo man hnem

Excise & Narcotics department (END) enforcement duty-te chuan, tun hnai khan heroin leh methamphetamine (meth) tam tham tak an man a, zu leh a kaihhnawih eng emaw zat an man bawk.

Champhaia END enforcement-te chuan June 17, 2019 zan dar 11:50 khan Mualkawi dáiah heroin gram 477.3 (hawng 33) leh a neitua puh Lalthanliana (26) s/o Khamzamung (L), Chhungte, Champhai district nia inchhál an man.

Aizawla END enforcement-te chuan June 18, Thawhlehni chhun dar 12 khan Chaltlang Lily Vengah methamphetamine kg. 19.723 (mûm 2,00,000) leh a neitua puh mi pahnih - Lalthanpuia (37) s/o C Buatsaiha, Hruitezawl, Lawngtlai district leh Iangkungi (40) d/o Phunrong, Halkha, Myanmar nia inchhálte an man bawk.

Heroin leh methamphetamine vanga mante hi The Narcotic Drugs & Psychotropic Substances Act, 1985 tlawhchhanin thubuai siamsak an ni. END thuchhuahin a tarlan danin, Mizoram hmun tinah dan kalha zu siam leh kawl an dap reng a, Champhaiah khawchhak lam aṭanga lo kal zu hlauhawm BEDC an man reng a, hmun dangah pawh state dang aṭanga zu lo lut man an nei fo.

Phunchawng leh Rangvamualah zu factory tam tak tihchhiat a ni a, rakzu tam tham tak man a ni bawk.