CM-in sorkar ram mimal pek tir a tum(?) Lunglei Venglai V/C-in an remti lo

Lunglei Venglaia mi pakhatin an venga sorkar primary school ram, a in hmun atana Chief Minister hnena a dil chu CM Zoramthanga chuan tihfelsak turin Land Revenue & Settlement department hotute ziakin a hriattir a; chutih laiin, Lunglei Venglai V/C chuan Venglai P/S ram mimal kuta pek an rem tih loh thu an tarlang.

Lehkhaa a lan danin, Peter Kaphranga, Lunglei Venglai chuan June 6, 2019 khan Chief Minister hnenah lehkha ziakin, Lunglei Venglai P/S chu a mimal in hmun atana pe turin a ngen a; a dilna chu tihhlawhtlinsak turin Lunglei district High Powered Committee vice chairman Lawmawma Tochhawng, MLA chuan lehkhaah a dilpuina a ziak bawk.

Peter Kaphranga dilna hi chief minister Zoramthanga chuan a bik taka ngaihtuahsak turin Lungleia Land Revenue & Sttlement department-a ASO-I chu ziakin a hrilh a ni. Hetih lai hian, Lunglei Venglai V/C chuan resolution pass in, Venglai P/S ram, mimal in hmun atana pek an remtih loh thu an tarlang a, "Dt.14.6.2019 Zirtawpnia Venglai Village Council/Court emergency meeting chuan, Venglai P/S ram hi vantlang ram atana Education Minister hnena kan dil mek a ni a, tuna mimal hnena pek tura hmalakna awm mek hi ṭha kan ti loin rem kan ti thei lo a, tuna hmalakna kal mek hi titawp turin thuneitute kan ngen a ni. Mimal hnena pek tura hmalakna reng reng Venglai V/C-te chuan a tàwp thlengin kan dodal dawn a ni," an ti.