KHAWTHLIR

CARE World Vision, Aizawl chuan June 11 aṭanga nimin thleng khan Project End Evalua-tion an nei a, nimin khan Hotel Regency-ah a hmáwrbâwkna hun hmangin, stakeholder-te nen CARE World Vision project dinhmun te, an hnathawh tawh leh thawh mekte an sawiho. CARE World Vision India hi kum 1996-ah Aizawlah a ding ṭan a, HIV/AIDS dona leh naupangte dikna chanvo humhalhna leh kawng dang dangahte hma an la a ni.

Finance changtu, chief minister Zoramthanga chuan INC member Nihar Kanti Chakma zawhna chhangin, Tlabung Sub-Treasury-ah hlawh la an awm loh thu a sawi a, "Tlabung Sub-Treasury-a post awmte denchhen hian thawktute lak an ni lo a, treasury hawn a nih khan department hnuaia thawktu awm sate transfer an ni. Mahse, sub treasury function tura phalna hmuh a nih tak loh avangin thawktute hi hmun dangah transfer leh an ni," a ti.

Integrated Diseases Surveillance Programme (IDSP), Serchhip district bultumin nimin khan Serchhip CMO conference hall-ah rannung seh natna chungchang inzirtirna, 'Awareness campaign on Rickettsial & Scrub Typhus' neih a ni. An tarlan danin, Serchhip district-ah hian kum 2018-19 (May 2019 thleng) chhungin rannung seh natna vei mi 700 chuang hmuh chhuah tawh a ni a, mi pahnihin an thih phah a ni.

June 18, Thawhlehni zan khan Mamit IPR conference hall-ah Nehru Yuva Kendra leh YMA Sub-Hqrs. Mamit ṭangkawpin Neighbourhood Youth Parliament an buatsaih a, bawrhsap Dr Lalrozama'n a hmanpui. Youth Parliament-ah hian Mamit khawpuia YMA branch pali - Venghlun, Chhimveng, Hmarveng leh Bazar Vengte an tel a, 'Ruih theih thilin khawtlang leh mimal a tihbuai dan' tih te, 'Nungcha leh ramngaw humhalh pawimawhna' tih leh, 'Zirna' tihte thupuia hmangin extempore speech-ah an intihsiak a ni.