Apex Bank Assembly CM-in a hmanpui Mipuite nuai tél hùmtir kan tum - CM

Mizoram Cooperative Apex Bank Ltd. (MCAB) chuan, nimin khan Vanapa Hall-ah Annual General Assembly vawi 26-na an hmang a, chief minister Zoramthanga khuallian a ni. Chief Minister chuan, "Mipuite hi pawisa a nuai tél hùmtir kan tum," a ti.

CM Zoramthanga chuan, "Kan economy innghahna chu pawisa a ni. Kut hnathawk, sorkar hnathawk, contractor, supplier-te innghahna chu pawisa a ni vek," a ti a; pawisa dah nan ram leh mipuiin bank an mamawh thu sawiin, chutiang atana remchang MCAB a awm chu lawmawm a tih thu leh, MCAB chuan state dang aṭanga an chhim tham bank nih tum se a duh thu a sawi.

Pathianin Mizoramah malsawmna tam tak a dah tih sawiin Zoramthanga chuan, "Income (lak luh) ṭha kum tin cheng nuai 5, nuai 10, nuai 15 lak luh theih nan kan ram hi a ṭha em em a, income ṭha kan neih theihna tur kan target a ni. Mipuite hi pawisa a nuai tél hùmtir kan tum a, chung mite chuan an sumte bank-ah vek an rawn dah dawn," a ti.

Ram hmasawnna chu cooperative system-in an kalpui dawn tih sawiin CM Zorama chuan, "Kan economic system hi land base (leilunga innghat) a tam ber a, land base economy hi cooperative system tel loin a kal tak tak thei lo. Chuvangin, cooperative system hi kan hmang ṭangkai dawn a, hmasawn zawngin kan kal dawn a ni," a ti a; kut hnathawh chu sorkar hnathawh ai mahin a hlâwk zawk dawn thu a sawi.

Mizoram leilung hmanga thil thar leh siamte chu Mizote kutkawih vek ni tura ruahmanna an neih thu sawiin Zoramthanga chuan, "Primary sector-ah production - Mizo vek, transportation system - Mizo vek, processing (a siamna) - Mizo vek, marketing - Mizo control vek. Chutiang chu kan target a ni a, chutianga kan tih tawh chuan kan economy chu khí-ah khí-ah a chho dawn a ni," a ti.

Chief Minister chuan, kum 10 chhung deuh thawh Mizorama kawngpuite a chhe em em vek tih sawiin, "Neitu thinlunga ṭan chuan thla 2/3 chhung lekin a mám pur thei a ni," a ti a; hmasawn turin ngaihtuahna thar a ṭul thu a sawi.

MCAB inkhawmpui hi MCAB Ltd. chairman T Lalmuanpuii'n a kaihruai a, chief executive officer Lalzuahliana'n report a pe. Chawhnu lamah rorel a ni a, report hrang hrang leh budget-te pawm a ni.

MCAB hi July 31, 1982-ah hawn a ni a, Tuikual, Aizawlah head office neiin, Mizoram hmun hrang hrangah branch 18 leh ATM booth 14 an nei mek. Kum 2018-19 budget-ah deposit (sum dah luh)-a an target chu cheng nuai 90380 a nih laiin, nuai 96577.12 an hmu a, an target chu cheng nuai 6197.12-in an khûm.

Kum 2018-19 chhunga loan pek chhuah an tum zat chu cheng nuai 16490 a nih laiin, nuai 14538.54 an pe chhuak a, an target chu cheng nuai 1951.46 (11.83%)-in an phâk lo. An credit-deposit ration chu 58.59% a ni.