Kum 2018-19 ah Education loan mi pali pe
Finance changtu chief minister Zoramthanga chuan, bank 11 aṭanga information an hmuh danin, kum 2018-19 chhungin education loan diltu mi paruk an awm a, pali pek an nih thu a sawi.
Chief Minister chuan ZPM member Lalduhoma zawhna chhangin, education loan chu Canara Bank-in mi pathum leh Mizoram Rural Bank-in mi pakhat an pek thu a sawi a, "Kan en zui zel ang," a ti a; education loan dil duhte hriat tur House a hrilh.
Education loan dil turte hriattur
# India ram chhungah sorkar pawmpui college/university-a diploma doctorate programme (Ph.D) course, IIM, IIT, etc. hnuaia course zir nan lak theih a ni.
# Ram danga zirna - MCA, MBA, MS, etc. zir nan leh job oriented professional/technical course zir nan lak theih a ni.
# Diltu chu India khua leh tui a ni tur a ni a, hei hian Non Resident Indian a huam.
# Diltu chuan sorkar pawmpui university/institution-ah admission a hmuh hmasak phawt a ngai.
# Loan chu zirna atana ṭul - fee, examination, library, laboratory fee, lehkhabu leina, hmanraw pawimawh leina, uniform leina atan lak theih a ni.
# India ram chhunga zirna bik atan medical course-ah Rs. 7,00,000 thleng a lak theih a, course dang atan chuan Rs. 10,00,000 thleng lak theih a ni. India ram páwna zirna atan Rs. 20,00,000 thleng a lak theih thung.