Zu avanga thi zat Sorkarin chhinchhiah lo

Excise & Narcotics department (END) leh Health & Family Welfare department-in Mizorama zu vanga thi zat an chhinchhiah loh thu nimina Assembly session-ah tarlan a ni.

MNF member Dr K Pachhunga zawhna, 'Zu avanga thi Mizoramah kum 2014 aṭanga vawiin ni thlengin engzat nge awm?' tih chu END minister Dr K Beichhua'n a chháng a, "END-in zu avanga thi chhinchhiah (record) a nei lo," a ti.

INC member C Ngunlianchunga'n ziaka chhân chi (unstarred question) hmanga zawhna a siam Health department-in an chhan dan chuan, March 2015 aṭanga March 2019 thlenga zu avang thi mumal taka sawi tur a awm loh thua an chhan thu House a hrilh.

END leh Health department-in zu vanga thi an chhinchhiah loh thu an sawi laiin, chief minister Zoramthanga'n March 20, 2019-a Assembly session-ah leh April 3, 2019-ah vantlang inkhawmah zu vanga thi mi 5,000 an awm thu a sawi niin C Ngunlianchunga chuan a tarlang a, CM Zoramthanga chu a ṭan chhan data a zawt a ni.

Chief Minister chuan, zu vanga thi nih chu tu chhung mahin an duh ngai loh thu sawiin, "Zu vanga thin ṭha lo pawh, thin ṭha lo vanga thi tih mai ṭhin a ni. Pastor pakhat chuan an venga mitthi 38 zinga 27 chu zu vanga thi an nih thu a sawi a ni," a ti.

Zoramthanga chuan, zu zawrh laia zu vanga thi chu a hmuh dan chuan 5,000 aia an tam a rin thu sawiin, "A tlem thei ang bera chhûtin 5,000 kan ti a ni," a ti a; police-ah ringawt pawh zu vangin mi 500 chuang an thih thu a sawi.

Chief Minister chuan, END leh department dangte pawh pawisa neih zat aṭanga uluk taka chhûtin thuam chak zel an nih tur thu a sawi a, "Rilrua ka neih dan chuan, Chief Secretary hoin department-te kokhawmin, eng ang post ruak nge an neih, kan pawisa neih dan azirin eng nge hnawhkhah ngai sawiho tur a ni," a ti.

END minister Dr K Beichhua tarlan danin, March 16, 2015-a MLPC Act hnuaia zu zawrh aṭanga MNF sorkar hnua zu khapna dan hman a nih thlengin zu (sap zu, beer leh wine) litre 3,70,30,041 hralh a ni.