Minister hlui PB Rosanga thlah liam a ni

Mizoram union territory a nih laia minister ṭhin PB Rosanga chu June 19, Nilaini zan dar 8 khan chuap cancer vangin a thi a, nimin khan an ina thlah a nih hnuah Kanan Veng Presbyterian Kohhran biak-inah vui a ni.

PB Rosanga s/o Chhun­bura (L) hi June 11, 1933-ah Hnahlan khuaah a piang a, kum 1963-ah B.A a zir zo. January 19, 1965-ah Darrochhingi nen Dawrpui Vengtharah an innei a, fa panga an nei. Presbyterian Kohhranah kohhran upa a nih bakah, a awmna vengah YMA president a ni tawh bawk.

BA a zawh hnu lawk, kum 1963-ah PB Rosanga hian MNF a zawm a, MNF party secretary a ni nghal. 1978-a MLA inthlanah PC party ticket-in Ngopa bialah thlan tlin a ni a, PC sorkarah cabinet minister a ni a, Health, Agriculture, Forest leh Community Development-te a enkawl. MLA ṭhenkhatin PC an chhuahsan vanga kum 1979-a inthlan ṭhatah Ngopa bialah bawk a tling leh a, PC sorkarah cabinet minister a ni zui leh bawk.

Kum 1998-a Assembly inthlanah Ngopa bialah MPC ticket-in thlan tlin leh a ni a, kum 2003 thleng MLA niin politics a chawlhsan zui a ni. PB Rosanga hi kum 2017, June-ah chuap cancer a nei tih hriat a ni. Hun eng emaw chen an inenkawl hnuah,  May 14-ah Aizawl Hospital-ah dah luh admit niin, June 19 zan khan damdawi-inah a thi ta a ni.