President-in Parliament-ah CAB a sawi chhuak RS MP-in Mizo mipuite inpuahchah turin a chah

President Ram Nath Kovind chuan nimin khan Parliament joint session-ah thu sawiin, Citizenship Amendment Bill (CAB) chu ennawna Parliament-ah pass tum a nih dawn thu a sawi. Hemi chungchangah hian Rajya Sabha MP Ronald Sapa Tlau chuan, Mizoram mipuite chu CAB dona atana inring turin a chah.

Nimina Parliament joint session chungchangah hian Ronald Sapa Tlau chuan, India President-in Mizote tana hlauhawm em em, atom bomb aia rapthlak zawk a thlak niin a sawi a, "MP inthlan dawna Amit Shah-te'n north east-ah ngei, kan sorkar chuan kan tharthawh leh dawn an tih ang ngeiin, President-in a rawn puang ta chiah mai. A sawi ber chu, India rama zalenna kan neihahte social, political leh cultural thila rahbeh mek kan mi leh sa, páwn lama awmte tan hian India ram hi zalen leh zau taka kan hawn a ngai a ni, tiin, he CAB hi kan revise dawn a ni, a ti a ni," a ti.

President thusawi avangin Mizote tan muanga ṭhut a har tawh tih sawiin Rajya Sabha MP chuan, "An mi leh sate tan chuan khatiang khawpa speech ropui kha khawvelah a awm thei dawn em ni, tih tur a ni a, keini tan erawh chuan thil rapthlak tak a ni," a ti a; Mizoram hma lam hun chu Parliament-ah a innghah thu a sawi.

Ronald Sapa chuan, CAB chu eng tikah nge an tharthawh dawn sawi theih a ni lo tih a sawi rualin, "Engtikah pawh introduce se, chiang em em chu - BJP-in a hma aia Lok Sabha-ah MP an ngah tawh avangin harsatna awm loin a tlang purh dawn tih a chiang lutuk. Rajya Sabha-a CAB kan tihtlawlh tâk ang khan, Rajya Sabha MP dinhmun hi tun maiah chuan a danglam thut dawn lo a, chuvangin, theihtawpa kan ṭan tlan chuan tih dan a la awm ka beisei," a ti.

Mizoram aṭanga Lok Sabha MP thar chu mipuiin an thlir ṭhup dawn tih sawiin RS MP chuan, "MP atana kan thlan tlin hian hetiang boruakah hian engtiangin nge hma an lak tak tak dawn, a thutiamah a ding nghet dawn em, tih hi Mizoram mipuite'n kan thlir dawn a ni," a ti.

Ronald Sapa chuan, Mizoram Lok Sabha MP chu Mizorama BJP thlâwp anga insawi ngam lo, Delhi-a BJP thláwp ṭha ber anga insawi si leh Mizorama CAB do tur anga insawi MNF party aṭanga thlan tlin a nih thu a sawi.

Ronald Sapa chuan, CAB chu pass a nih a, chumi hmanga Bangladesh-a Chakma-te Mizorama an tleh luh chuan Mizo mipuite chu hnam boral mai thei an ni tih a chian thu a sawi a, "He thil hi Parliament-a a tlang chuan nang leh kei hian dan ang thlap chuan tih theih kan nei dawn tawh lo a, dan loa chet sawi mawi chi a ni si lo. Chuvang chuan, tuna hun kan la neih lai hian kan mithiamte leh mithiam lote pawh theihtawpa inpuahchah turin kan inngen a ni," a ti.