MZU hnuaiah graduate thar 2,812 an awm

21st June, 2019

Mizoram University chuan nimin khan undergraduate second semester, fourth semester leh sixth semester exam result a tichhuak. Sixth semester-ah zirlai exam 4,388 zinga 2,812 an pass a, pass percentage chu 64.08% a ni.

Graduate thar zingah Laltlanmawii, Pachhunga University College (PUC)-a Mathematics department chuan mark/point a hmu sang ber.

Sixth semester (final year) bikah chuan, B.A-ah zirlai exam 3,599 zinga 2,241 (62.27%) an pass a; regular student 2,041 (63.70%) leh repeater 200 (50.63%) an ni. B.Sc.-ah chuan zirlai 500 zinga 337 (67.40%) an pass a, regular student 311 (70.05%) leh repeater 26 (46.42%) an ni.

B.Com.-ah zirlai exam 262 zinga 214 (81.68%) an pass a, regular 207 (84.15%) leh repeater pasarih (43.75%) an ni a; B.Sc. (Home Science)-ah exam mi 27 zinga 20 (74.07%) an pass a, regular 13 (72.22%) leh repeater pasarih (77.78%) an ni.

Gold medalist (stream tina tiṭha ber)-te chu hmeichhia vek an ni a; chu'ngte chu - B.A-ah Teresa Lalnunpuii, Sociology department, PUC te, B.Sc.-ah Laltlanmawii, Mathematics, PUC te, F Lallawmawmi, Commerce, Hrangbana College-te leh, Vanlaldanhlui, Home Science, Zirtiri Residential Science College (ZRSC)-te an ni. B.Sc.-a gold medalist Laltlanmawii chuan a pumpuiah mark/point (CGPA) a hmu sang ber a, 9.460 a hmu tling.

Undergraduate-ah hian subject/department 23 a awm a, subject 23 zinga 19-ah PUC-in subject-a ti ṭha ber (topper) an nei a, Hrangbana College-in pahnih leh Zirtiri RSC leh Lunglei College ten subject topper pakhat ve ve an nei. Subject topper 23 zinga 17 chu hmeichhia an ni a, paruk chu mipa an ni.

Fourth semester-ah chuan, B.A-ah exam hmachhawntu mi 4,180 zinga 2,878 (68.85%), B.Sc.-ah zirlai 558 zinga 430 (77.06%), B.Com-ah zirlai 306 zinga 256 (83.66%) leh B.Sc. (Home Science)-ah mi 17 zinga 13 (76.47%) an pass a; a pumpuiah zirlai exam 5,061 zinga 3,577 (70.68%) an pass.

Second semester-ah chuan a pumpuiah zirlai exam mi 7,377 zinga 3,828 (51.89%) an pass. B.A-ah zirlai 6,250 zinga 3,121 (49.94%), B.Sc.-ah zirlai 807 zinga 465 (57.62%), B.Com.-ah mi 289 zinga 228 (78.89%) leh B.Sc. (Home Science)-ah zirlai 31 zinga 15 (48.39%) an pass a ni.