CADC area-ah non Chakma tan ram Neih phal lohna dan a awm lo - LRS Minister

Land Revenue & Settlement (LRS) minister Lalruatkima chuan, Chakma Autonomous District Council (CADC) huam chhungah Chakma ni lote tan in hmun, lo leh ram neih phal lohna dan siam a awm loh thu a sawi.

ZPM member Lalduhoma zawhna chhangin Lalruatkima chuan, "CADC huam chhungah Mizote emaw, non Chakna dangte tan in hmun lo ram neih phal lohna dan siam a awm lo. In hmun lo ram neih phal lohna dan CADC-in siam theihna an neih leh neih loh hi LRS department-in a hre lo," a ti.

Lalduhoma chuan, CADC area-ah Mizo eng emaw zat an awm a, chung mite chuan harsatna an neih loh thu a sawi rualin, "A awm thar turte CADC-in in hmun an pe duh lo tih social media-ahte tarlan a ni a, thu tak a ni em tih zir chian a ṭhat a rinawm," a ti a; sorkarin a zir chian theih leh theih loh a zawt.

LRS Minister chuan, CADC-ah Chakma ni lo, Mizo leh Bru chên khawmna a tam tih sawiin, "Chu'ng mite chu CADC hian residential pass a pe ṭhin. 6th. Schedule-ah anni hian inrêlbâwlna hranpa an siam thei a, mahse, Governor-in a pawm phawt a ngai. In hmun pek theih lohah dan hranpa an siam hriat a ni lo a, a ṭul angin enfiah a ni ang," a ti.

ZPM member C Lalsawi­vunga zawhna chhangin Lalruatkima chuan, "Tunah hian surveyor post ruak 45 a awm mek. Surveyor indaih lohna avanga hna kal muang lutuk tiziaawm turin nikum lamah 10 lak a ni," a ti a, tun dinhmunah chuan surveyor lak tumna a awm rih loh thu House a hrilh.

LRS Minister chuan, Survey Training Institute, Hualngohmuna dinna turin PWD Project Division-III ten kum 2006-ah project proposal an siam thu a sawi a, "Tunah hian North Eastern Council leh 15th. Finance Commission-ah funding zawn mek a ni," a ti.