Music Walk of Fame-ah Amy Winehouse lalut dawn

Kum 2011-a kum 27 mi nia thi ta, Amy Winehouse chu March 4 hian Music Walk of Fame-ah lakluh a ni dawn.

Camden khuaa Amy Wine­house hriatrengna siam chu March 4 hian khuh hawn a ni dawn a, a puala inkhawmna neih a nih zawh hian  Amy Winehouse foundation kaihhruainain  Stables Market-ah fundraiser neih a ni nghal dawn a ni.

Amy nu leh pate chuan hemi chungchangah hian thuchhuah siamin Camden chu a hmun ngaihnat a nih thu leh a hmun ngaihnatah ngei mai a hming dai ngai tawh lo tura a awm tur chu thil inhmeh tak a ni tih an sawi. ‘Music Walk of Fame’-a a tel tur hi chawimawina  ani a, Amy music legacy hetiang kawnga lawmsak a ni tur hi kan lawm hle a ni, an ti.

'Back to Black' singer hi kum 2011 July 23 khan a lar vanglai takin zu in nasat lutuk vangin a thi a, ruihhlo leh zuin a nun a tibuai a, a hneh zo ta ngang bik lo a ni. Jazz, blues leh soul singer-ah chuan ani anga khawvel huapa lar hi an tam lo hle ang. Back to Black album kha a hunlai khan kum zabi 21 laia UK-a album hralh ṭhat berte pawh a ni hman hial. 

VH1 phei chuan 100 Greatest Women in Music list an siamah 26-naah an dah a ni. Album pahnih- Frank leh Back to Black-te chu a dam laiin a tlangzarh hman a,  Island Records chuan a thih kum, Kum 2011 December-ah khan a hla tlangzarh loh, a laina hnaite'n an duhzualte chu dahkhawmin 'Lioness: Hidden Treasures' tiin a hming an vuah a, an tlangzarh leh bawk.