MNF ke a bai, kum 5 an kal ka ring lo - Lal Thanhawla

Mizoram Pradesh Congress Committee (MPCC) president Lal Thanhawla chuan nimin khan Congress Bhavan-ah thu sawiin, "MNF sorkar hi kum nga an kal ka ring lo, an pên ṭan aṭangin an ke a bai," a ti.

Lal Thanhawla chuan MNF kaihhruai sorkar hma lam hun tur nia a hmuh dan a sawi a, "An hotupain a eiru hnem em em a ni. A sum lak luh leh hman a inthlau hle. Kei hi kum 10 chhung tàntir min tum a, min tàntir thei lo. MNF hotupa hi tàntir kan tum ve miah lo chung hian a táng ang tih ka hlau," a ti.

MNF sorkar chu ke an pên tirh aṭangin an ke a bâi nia a hmuh dan sawiin MPCC President chuan, "Mahni thutiama ding lote hi Mizo mipuite'n engtin nge an ngaih ang? SEDP hnuaia cheng nuai thum sem a tiam a, chumi dawn duh vanga vote-tute an beidawng dawn. Sorkar hi a tlak hun huna tho leh tur chu Congress party hi kan ni," a ti.

Congress party President chuan, hming phuah tawh inthlaksak chu intham loh thlak a tih thu sawiin, "MNF-in thil hming an thlak hi min tham lohzia lantirna a ni. An thlak dawnin kan hotute tu emaw ber ráwn tal se chuan min zah der ve deuh a tih theih ang," a ti a, MNF chu anmahni chhanchhuaktute thil tih hming thlaksakah a puh.

MPCC President chuan, secretariat awmna hmun thlak turin Khatlaa Assam Rifles ramah New Secretariat Complex din tura hma an lak thu sawiin, "Kan secretariat a hlui deuh tawh vang te, min dâwl zawh tawh loh vangte leh khawpui lûn laia awm a nih avangin secretariat sawn turin hma kan la a ni. A hmun a zím lutuk, capital complex tih tham a ni lo," a ti.

Lal Thanhawla chuan medical college chu research tihzelna atana thui tak ngaihtuah chungin a hmingah MIMER tih phuah a nih thu sawiin, "Hetiang hi Mizoram tih pawh ni lo a, Zoramthanga hminga thlak mai mai chi a ni lo," a ti a, Zoram Medical College tih chu put hlen chi a nih loh thu a sawi.

MPCC President chuan, "Council of Minister ṭhutkhawmnaah tuin emaw CM tlawnna atan a hming chawia medical college hming phuah tum mah se, Zoramthanga tan chuan duh chi a ni lo. 'Kan lo tih chhiat vek tawh an siamṭha leh a, ka hminga tih chi a ni lo,' tih nacháng hre âwm tak a ni a, zah ngawih ngawih âwm tak zawk a ni," a ti.