Mau chi ṭha an rawn thawn tawh - Chief Minister

ZPM member Lalduhoma zawhna kal zelah Horticulture changtu chief minister Zoramthanga chuan, mau/rua chi ṭha Mizoramah a thawn luh a nih tawh thu House a hrilh.

Chief Minister chuan, tun hma zawngin India ramah mau chu hlawhchhamna a nih thu sawiin, "Tunah chuan kan flagship programme pui ber a ni. Tun hma chuan a ṭiak apiang a ṭha vak lo pawh kan phun a, paih leh kha hna a tling. Gelatine-a bomb darh leh JCB hmanga nawrte a ngai ṭhin. Tunah chuan a chi ṭha hmuh chhuah a ni tawh a, an rawn thawn tawh," a ti.

Mau/rua chi ṭha chu thla tin nuai bìa rawn thawn an tum nia sawiin Zoramthanga chuan, "A maktaduai téla min rawn thawn turin kan ti," a ti a, mau chi ṭha chu pakhat Rs. 30-40 man a nih thu a sawi. Chief Minister sawi danin, mau/rua ten puitling turin kum 4-5 a mamawh a, a len tham avangin a lak chhuahna atan link road a pawimawh. Link road chu siam a, mau a puitlin huna hman ṭangkai  theih tura buatsaih a ngai dawn a ni.

In 100 awmna khua chuan a tlem berah mau/rua pum nuai thum an thar thei dawn a, chumi sawngbawl tur chuan an khuaah mau sawngbawlna industry din a ngai dawn tih chief minister chuan a sawi bawk.