MSSSB - party induh-sakna hmanruaah ngai

ZPM senior vice chairman Dr Kenneth Chawngliana chuan, MNF sorkarin MPSC thuneihna laksak a, sorkar hna group B chin latu tur Mizoram Subordinate Service Selection Board (MSSSB) din a tum chu party mal induhsakna hmanrua tur a nih thu a sawi.

Nimina ZPM inkhawmah Kenneth Chawngliana chuan, MSSSB chu party mal induhsakna kenkawhna hmanraw ṭha lo tak a nih thu sawiin, "MPSC-a chairman ni tawh ṭhin mi pali laiin tuna sorkarin hmalak a tum dan hi thil ṭul lo, pawisa sên ral tamna mai leh ṭhangtharte zinga a sang zawnga inelna thianghlim tak awm mek tichhetu tur a nih thu an sawi hi ngai pawimawh loa an titlang lui a nih chuan, Mizo hnam pumpui ngaihtuahna put phung leh rilru tlakchhiatna lian tak thlentu a ni ngei ang," a ti.

Dr Kenneth Chawngliana chuan, MPSC chungchanga sorkar thil tih dan chu, minister-te'n Governor hmaa rinawmna thutiam (Oath of Affirmation) an chhamah - 'India Constitution leh danin a phût angin, mi hrang hrang hnenah hlauh emaw, duhsak bik emaw, ngainat bik leh mil loh bik emaw nei miah loin, dik takin thil ka ti ang' an tih bawhchhiatna a nih thu a sawi a ni.