IPR director thlahna leh lawmna hun hmang MJA VP chhungte hnenah sorkar râlna hlan

Mizoram Journalists' Association (MJA) Gen. Hqrs. chuan nimin khan Aizawl Press Club-ah Information & Public Relations (IPR) director kal chhuak David L Thangliana thlahna leh IPR director thar Lallianpuii lawmna inkhawm an buatsaih a; MJA vice president thi ta R Lalhmangaihzuala chhungte hnenah sorkarin a ràlna hlan nghal a ni.

Inkhawm hi MJA vice president Lalremsiama'n a kaihruai a, prominent journalist Lalbiakthanga Pachuau-in hunserh a hmang. MJA president Zonunsanga Khiangte chuan, David L Thangliana chu journalist-te tana ṭhahnemngai leh duhsaktu a ni tih sawiin, sorkar hna aṭangin châwl tawh mah se, media khawvela la chám zui zel tura an duh thu a sawi a; a hun laia MJA tan project site visit leh press tour-te a buatsaih avangin lawmthu a hrilh.

MJA president chuan, IPR director thar Lallianpuii chu journalist-te harsatna hrethiamtu leh an harsatna sukianga an mamawhte phuhrûk tura theihtawp chhuahtu a nih thu a sawi a; IPR leh MJA ten thawhhona ṭha tak an neih ṭhin chu chhawm nun zel a duh thu a sawi bawk.

IPR director aṭanga May 31, 2019-a pension ta David L Thangliana chuan journalist-te fuihna thu sawiin, chanchinbu leh TV news-te chu political party-ah ṭan bik nei lo turin a chah a, "Party ṭan bik kan neih a, chu chu kan chanchinbu leh TV-ahte kan tilang a nih chuan kan kalsual tihna a ni ang. Eng party pawh sorkar se, an policy-te mipui hnena zirtirtu tur kan ni. Party ṭan bik neia mipuiin an hriat tawh che u chuan, in thu leh hla an ngai pawimawh tawh lo ang," a ti a; chutih rualin, thil dik lote chu huaisen taka puangzara do turin a fuih.

IPR director thar Lallianpuii pawhin thu sawiin, an hun hman chu IPR leh MJA-te thawhho ṭhatzia tichiangtu a nih thu a sawi a, "Ṭha takin kan thawkho zel ang a, kan tlin lohnaahte min finchhuah rawh u. Sorkarah nawrho tur a awm chuan kan nawrho zel ang. Ngaihtuahna hriam nei zel ang che u," a ti.

Inkhawmah hian March 15, 2019-a MJA vice president a nih laia thi R Lalhmangaihzuala, editor, Romei hnena sorkarin a ralna (ex-gratia) Rs. 1,50,000 chu IPR director Lallianpuii'n R Lalhmangaihzuala nupui Lalfamkimi hnenah a hlan. Accredited journalist ni lai an thihin Mizoram sorkar chuan ex-gratia Rs. 1,50,000 a hlan ṭhin a ni.