MADC-ah Congress MDC-te'n BJP an zawm MNF MDC-in complaint an thehlut

Mara Autonomous District Council (MADC)-a Congress MDC (member of district council)-te chu BJP Legislature Party-ah an inchhûng lut vek. Hetih lai hian, Congress MDC-te'n dan an bawhchhia nia ngaiin MNF Legislature Party-te'n complaint an thehlut.

Congress MDC-te hian June 20, 2019 khan MADC Chairman hnenah lehkha thehlutin, June 19-a Congress Legislature Party (CLP) ṭhukhawm chuan CLP hi ṭhiah a, BJP Legislature Party zawm tura thutlukna an siam thu an tarlang.

An lehkha thehluha a lan danin, CLP meeting-ah hian MDC 20 zinga panga chu hmun dangah an awm a, telephone hmanga biaknaah, an meeting thutlukna chu an pawm tih an ziak a ni.

Hetih lai hian, MADC-a MNF Legislature Party chuan Congress MDC-te thil tih dan chu Constitution Conduct Bussiness (CCB) Rules kalh nia an hriat avangin MADC Chairman leh Minority & District Council Affairs-ah nimin khan complaint an thehlut.

MNF Legislature Party leader Lalmalsawma Zasai chuan, Congress MDC-te thil tih dan chuan CCB Rules a kalh tih Vanglaini a hrilh a, "Kan danah chuan MDC-te'n anmahni candidate-tu party an chhuahsan chuan MDC aṭangin an bân a ngai a ni. District Congress ang tawp chuan lut se thu hran a ni a, anni lam hi an bâng ve chuang lo a ni," a ti.

MADC-ah hian MDC seat 28 (elected 25 leh nominated pathum) a awm. Congress MDC-te'n BJP an zawm hma hian Congress party-in MDC 20 (nominated 3 nen), MNF-in MDC panga, BJP-in MDC pahnih neiin, independent MDC pakhat a awm. Independent-a thlan tlin chu a thih tawh avangin MDC 27 an awm mek a ni.