Hna lakah minister pakhat a rawn inrawlh - K Riachho, ex MPSC chairman

MPSC chairman hlui K Riachho chuan MPSC chairman a nih laiin  hna an laknaah thu neih tumin minister pakhat chiah inrawlh a awm thu a sawi.

MPCC Minority Cell-a chairman ni mek K Riachho hian nimin khan Congress Bhavan-ah thu sawiin, "MPSC chairman ka nih ve chhungin Congress sorkara thuneitu sang, minister-ho zingah thu rawn neih tum pakhat chiah a awm. Minister hi tunah chuan kan zing (party)-ah a awm tawh lo," a ti.

K Riachho sawi danin, minister pakhat hian doctor eng emaw zat lak turah 'heng mite hi lak ni se' tiin list a siam a, mahse a list siam zinga mi tumah an tling ta lo. MPSC chairman a nih laiin khatih laia chief minister Lal Thanhawla emaw minister dang hna an lakna turah inrawlh tum an awm loh thu sawiin, "Political party-ho zingah pawh tumah rawn inrawlh tum an awm lo," a ti.