KHAWTHLIR

Chief secretary Lalnunmawia Chuaungo chuan district headquarters thar pathum - Hnahthial, Khawzawl leh Saituala superintendent of police (SP) office dinna tur hriattirna a chhuah. He hriattirna (notification) hi June 18, 2019 khan chhuah a ni.

MNF member Lalrin­tluanga Sailo zawhna chhangin GAD changtu chief minister Zoram-thanga chuan tun din­hmunah Mizoram Public Service Commission (MPSC) tihlen tumna a awm loh thu House a hrilh. Chief Minister tarlan danin, tun dinhmun­ah hian MPSC-ah hian chairman leh member pahnih bakah thawktu dang 64 an awm mek a ni.

Thingsultliah Hospital Area Branch YMA leh Thingsultliah Higher Secondary School NSS-te chuan nimin khan an khuaah blood donation camp an huaihawt a, Aizawl Civil Hospital tan thisen unit 63 an pe a, a petute mipa 61 leh hmeichhia pahnih an ni.

ZPM member Dr Vanlalthlana zawhna chhang­in School Education minister Lal­chhandama Ralte chuan RMSA leh SSA hnuaia zirtirtu thawk mekte dinhmun ṭha zawka an awm zel dan tur sorkarin a ngaihtuah mek thu House a hrilh a, "RMSA leh SSA hnuaia zirtirtu awmte hi UGC pay hmantir tumna a awm lo," a ti.

Central Young Lai Asso-ciation chuan thu­chhuah siamin, population census an neih chhunga anmahni lo buaipuia lo ṭawiawmtu zawng zawngte chungah an lawm thu an tarlang a, "CYMA, MZP, MSU leh LSA-ten min thlawp tlat avangin kan lawm hle. Kan hnam dam nan leh kan ram a lo him zel theih nan ke kan pen zel dawn," an ti.

Siaha DC Bhupesh Chaudhary chuan nimin khan Siaha DRDA conference hall-ah Kawng Kawhhmuhtu (Mentorship) tih a tlangzarh. Kawng Kawhhmuhtuin a tum chu - Siaha district-a sorkar enkawl middle school leh high school naupangte'n an zirna kawnga tun aia hma an sawn theih nan khawtlang mipuite nena mumal taka thawhho a ni.