International Day of Yoga hman a ni

Nimin June 21 kha International Day of Yoga a ni. Yoga Day hi India ramah uar taka hman a ni a, Mizoramah pawh Lammualah leh hmun dang ṭhenkhatah hman a ni.

Lammuala International Day of Yoga hmanna chu Assam Rifles huaihawt a ni a, chief secretary Lalnunmawia Chuaungo khuallian a ni. Sorkar laipui hnuaia awm institution hrang hranga mite an tel a, Lammualah Yoga session an nei nghal a ni.

Yoga Day hi Ministry of Information and Broadcasting hnuaia Field Outreach Bureau chuan Kendriya Vidyalaya, Ṭhuampuiah an hmang a, sorkar laipui hnuaia awm department leh organisation dangte pawhin an hmang bawk.

India prime minister Narendra Modi-a'n a ngen angin United Nations chuan kum 2014 khan June 21 chu International Day of Yoga atan a puang a, kum 2015-ah hman ṭan a ni. Mizoramah erawh chuan kohhrante'n Yoga chu Kristianna nena inrem loa an ngaih avangin an duh lo a, tlawmngai pawl lian ber Central YMA pawhin kum hmasa lamah chuan Yoga Day hmannaa tel lo turin YMA member-te a lo chah tawh ṭhin a ni.