ZIDCO-in loan pek kan tum - Lalthlengliana

MNF party-in nimina Mizo Hnam Runa inkhawm an buatsaihah ZIDCO chairman Lal­thlengliana'n thu sawiin, ZIDCO-in loan pek chhuah leh an tum thu a puang a; "Kan rálthuam pawimawh ber chu Pathian a ni reng tur a ni," a ti.

ZIDCO Chairman chuan, Congress sor­karin kum 10 chhung ZIDCO an enkawl danah ngaihtuahna an hmang lo a, an ṭhu mai mai ringawt niin a sawi a; MNF sorkarah mipui beisei angin ZIDCO chu siamthar leh an tum thu sawiin, "Project hrang hrang siamin bul kan ṭan chho mek a, kan hlawhtlin thuai ka ring. ZIDCO hian loan chi hrang hrangte hi pek leh theih kan tum a ni," tiin a sawi.

Lalthlengliana chuan, "Engtik lai pawh hian MNF chuan kan ralthuam pawimawh ber chu Pathian a ni reng tur a ni a, Pathian duh loh záwng - rál lâk sum leh hluihlâwn thilte kan la tur a ni lo," a ti a; sorkarna an chan chhan chu tute emaw ropui bik vang ni loin, an zavaia inlungrualna leh thawhhona ṭhat vang a nih thu leh MNF sorkar aṭanga hamṭhatna kal turte chu rualkhai taka an chan tlân a ṭul thu a sawi.

Zoramthanga kaih­hruai sorkar hmalak­na tlemtê chinah mipui an lâwm thu sawiin Lalthlengliana chuan, "Kawngpui chhia siamṭhain, zirtirtu hlawh táng reng pek nghal a ni kha a ropui. Kan CM ngaihtuahna leh hmathlirte hi a ṭhain a ropui a, kan MLA-te lah mithiam leh fel tak tak an ni a, a thlamuanthlak hle a ni," a ti.