Khawzawlah infuih tharna hun hmang

Khawzawl DC pisaa thawkte chuan nimin khan DC conference hall-ah bawrhsap H Lianzela hoin infuih tharna hun an hmang.

H Lianzela chuan, Mizo Kristiante hunpui laiin boruak muanawm tak hnuaiah Khawzawl district mipuite'n hun an hmang tih sawiin, "Krismas leh kumthar hman zawh takah Khawzawl district-ah harsatna leh buaina thleng sawi tur a awm lo a, a lawmawm hle. District dang zawng aiin hâlpuah leh hâlmawi hâl hmuh leh hriat tur a tlem zawk a ni," a ti a; thuneitute leh tlawmngai pawl hrang hrangte hmalakna leh mipui thuawihnaah lawmthu a sawi.

Khawzawl DC chuan, kum 2020 thil thar hriat belh kuma hmang turin thawktute a chah a, "Tun hma chuan sum leh pai hi mihringte hausakna tehfungah ngaih ni ṭhin mah se, tunlaiah chuan hriatna hi hausakna tehfung a ni tawh zawk. Hun kan vawng dik ṭheuh tur a ni a, hotute vang ni loin, mahni ṭheuh sorkar kan ni tih inhriain thawk ang u," a ti.

Khawzawlah hian nimin aṭang khan DC office, BDO office leh KVK-te chu mipui dawr theih turin an inhawng ṭan a, Power & Electricity leh PWD office-te chu January 6-ah an inhawng tawh a, sorkar department dang pisate erawh an la inhawng mumal rih lo tih Khawzawl aṭanga thu dawnna chuan a tarlang.