Inkhawma zaiho leh zana inkhawm Chawlhkar thar aṭangin a theih dawn
Mizoram sorkar chuan biak-ina inkhawmah zaiho a phal tawh dawn a, zan lama inkhawm pawh chawlhkar khatah vawi (zan) hnih neih a phal tawh dawn. Hei hi chawlhkar thar aṭanga kalpui ṭan theih a ni ang.
Health minister Dr R Lalthangliana hoin nimin khan Secretariat Conference Hall-ah Mizorama Covid-19 hri léng dinhmun thlirho a ni a; Mizoramah hripui léngin ziaawm lam a pan zela a lan avangin chawlhkar khatah zan hnih biak-ina inkhawm neih tawh ni se, an tih bakah, inkhawmah zaiho phal tawh ni se, an ti. Heng atan hian State Disaster Management Authority hnuaia State Executive Committee-in inkaihhruaina a siam dawn a ni.
Meeting chuan, vawiin leh naktuka Khatla kohhran biak-ina neih tur Mizoram Presbyterian Kohhrana Kohhran Hmeichhe Inkhawmpui Lianah palaite biak-in huam chhungah an riah vek dawn avangin zana inkhawm an phalsak nghal bawk.
Sorkar thuchhuah tarlan danin, ṭhutkhawmah hian, State Referral Hospital (ZMC) chu March 15, 2021 aṭangin Covid-19 veite chauh ni lo, damlo dangte pawh admit theih a nih tur thu tarlan a ni.
SRH-ZMC-ah hian Covid-19 veite awmna ward leh damlo dangte awmna ward a hranpa a siam a ni a, a panna kawng leh luhkáte pawh a hranpaa siam a nih avangin hlauhthawn tur a awm loh thu an sawi. Covid-19 dona atana hmanrua leh bungruate chu tun dinhmunah indaih lohna a awm rih loh thu tarlan a ni bawk.
Covid-19 laka invènna damdawi (vaccine) Covishield chu Mizoramin dose 1,28,840 a dawng tawh a, chu'ng zinga 55,780 chu mipui vantlang (kum 60 aia upate leh kum 45-59 inkar natna benvawn neite) hnenah a thlàwna pek tur a ni a; sorkar laipuiah dil belh tum mek a ni.
Mizoramah hmun 31-ah Covid-19 vaccine pekna hmun siam a ni a; vaccine chu mi pakhatin dose hnih zel lak tur a nih angin, Mizorama lo thleng tawh sa aṭangin dose khatna la tawhte'n dose hnihna an lak leh tur dahṭhat nghal zel a ni.
Meeting chuan, chhiatni ṭhatnia hman tur inkaihhruaina chu a ṭul anga ennawn turin SDMA hnuaia State Executive Committee an ruat bawk.
Ṭhutkhawmah hian Home minister Lalchamliana, Covid-19 Medical Operational Team chairman Dr ZR Thiamsanga, MLA, sorkar department hrang hrang hotute bakah, Mizoram University, Mizoram Kohhran Hruaitute Committee, Joint NGO Coordination Committee, Indian Medical Association leh MZP aiawhte an tel a ni.