Chin hriat lohin Cheng nuai 7 a awm
Nimina Assembly session-ah INC member Zodintluanga Ralte chuan contractor tana sum pek chhuah zingah contractor hnen thleng lo cheng nuai 7 a awm thu a sawi a; Social Welfare minister Dr K Beichhua'n chhangin, sum chu an zawn chhuah tur thu House a hrilh.
Zodintluanga Ralte chuan, Champhai North-ah anganwadi centre 14 atan centre pakhatah Rs. 2,00,000 ṭheuh pek chhuah a nih thu sawiin, "Cheng nuai 1.5 ṭheuhin contract thawhtir an ni. A bâng cheng nuai 7 hi contractor hnenah a thleng lo a, MNF block ni turah ka ngai a, Champhai North treasurer Lalhmangaiha tih hminga lak chhuah a ni. Hei hi zawng chhuakin, hrem ngai an awm chuan in hrem thei ang em?" tiin a zawt.
Social Welfare Minister chuan Zodintluanga Ralte thusawi chu a la hriat loh thu a sawi a, thil thlen dan zawng chhuakin, a ṭul anga zirin hma an lâk tur thuin a chháng a ni.
INC member Lalrindika zawhna chhángin Dr K Beichhua chuan, Seṭhàwna ruihhlo ngaite enkawlna hmun Jordan Centre chu budget session zawhah hawn theih beisei a nih thu a sawi.
Dr K Beichhua chuan, Jordan Centre chu a in, a hungna, duty post leh kawng (internal road)-te chei ṭhat a nih thu a sawi a, "Jordan Centre chei ṭhat leh tihchangtlunna atan cheng nuai 920.72 sanction a ni. Kum 2020-21 financial year chhunga zawhfel tum a ni. Budget session zawhah hian hawn theih ngei kan beisei," a ti.