MSU-in HTE Director dan an tum HTE Director-ah Mizo dah an phût

Mizo Students’ Union (MSU) General Headquarters chuan nimin khan Higher & Technical Education (HTE) director atana Nazuk Kumar, IAS dah an duh lohna lantirin HTE office kawtah an pungkhawm a, Director pisa kai tur dan an tum. 

MSU leh police-te rei vak lo an innawr a, Director pisa kai tur an dang thei lo. Zirlai an punkhawm belh zel a, hun engemaw­chen lirthei veivak thei loin kawngpuiah an awm khawm a ni. 

MSU-te punkhawmna hmun­ah hian tlai dar 4 velah HTE secretary Esther Lalruatkimi a kal a, sorkarin transfer order a chhuah thuai beisei tura zirlaite chahin, "Transfer order a chhuah hma chu director anga function lo tura hriattir nghal a ni," a ti. HTE Secretary thusawi zawh hian zirlaite chu an ṭîn ve nghal a, tlai dar 4:30 velah an ṭîn darh kim.

MSU hruaitute tarlan danin, Mizoram sorkar hnenah HTE director atan Mizo officer dah tura ngenna an thlen tawh a; director thar Nazuk Kumar pawh kâwmin, Mizo dah a nih theih nan pisa kái tawh rih lo turin an ngen tawh a ni.

Vanglaini palai zawhna chhangin Nazuk Kumar chuan, MSU-te'n an dan chungchangah sawi tur a neih loh thu a sawi a, "Kei chu sorkarin min dahna hmun apiang ka pawm a, khawi hmunah pawh min dah se theihtawp chhuahin ka thawk ang," a ti. Nazuk Kumar hi February 18, 2021 khan ICT addl. secretary atana dah a ni a, February 24, 2021 ah Supply director-ah sawn niin, February 26, 2021 ah HTE director-ah sawn leh a ni.

An ngenna a hlawhtlin loh avangin MSU chuan nimin khan Nazuk Kumar pisa kái tur dan tumin an pung khawm a, MSU hruaitute bakah, college ṭhenkhata students' union hruaitu ṭhenkhat an tel. Director-in pisa kawt a thlenin police nen hun rei vak lo an innawr a, police-in an nawr kian avangin harsatna awm loin Nazuk Kumar chu pisaah a lut thei a ni.

Nazuk Kumar-in pisa a chhuahsan loh nan MSU chu HTE pisa kawtah an ṭhukhawm zui a; MSU president J Lalmuanzuala chuan thu sawiin, Nazuk Kumar chu mimala huatna leh duh lohna an neih loh thu a sawi a, "Mithiam leh mi dik tak a nih kan ring a, department dang enkawl se chuan theihtawp chhuahin MSU chuan kan thawhpui ang. Mahse, HTE enkawl tur chuan Mizote dinhmun hrethiamtu Mizo ngei kan duh a ni," a ti.

MSU President chuan, tun hmain HTE director-ah hnam dang dah a nihin technical leh medical bakah, HTE hnuaia entrance exam hrang hrang buatsaih ṭhinah buaina a chhuah fo tawh avangin Mizo officer ngei awm a ṭula an hriat thu a sawi.

Nazuk Kumar pisa kái tur dang thei lo mah se, pisa a chhuahsan tur an dan tur thu sawiin Lalmuanzuala chuan, "Vawiinah (Thawhlehni) hian a transfer order a chhuah loh chuan pisa a chhuahsan tur hi kan dang tlat dawn a ni," a ti a; an thil phût hrethiama ngai pawimawh turin sorkar a ngen a ni.