KHAWTHLIR

Nimin Assembly session-ah MLA aṭanga Public Accounts Committee (PAC) member Lalduhoma bàn a nih avangin a aiawh tur thlanna buatsaih a ni a, BJP member Dr Buddha Dhan Chakma chu chuhtu awm loa thlan tlin a ni. Dr BD Chakma hi MNF member Prof. F Lalnunmawia'n a rawt (nominate) a ni.

Finance changtu chief minister Zoramthanga chuan INC member Zodintluanga Ralte zawhna chhángin, Excise & Narcotics department hnuaiah zu zuarte'n an zu zawrh an bànsan theihna tura eizawnna siamsak an awm loh thu House a hrilh. Zodintluanga hian Rangvamual leh Phunchawnga zu zawrh an bànsan theihna turin eizawnna mumal siamsak tawh zat a zâwt a ni. 

Traffic SP Rodingliana Chawngthu-in nimin thuchhuah a siam danin, SIPMIU-in March 22, 2021 thleng Civil Hospital bus stand leh Zarkawta Lal Thanhawla in inkarah te, Maj. Laldailova Traffic Point leh P&Sons, Dawrpui inkara leh, Saron Venga Police Rûn leh TS Market, Chhinga Veng inkarahte pipe phûm hna an thawh dawn avangin kawngpui chanve khâr zel a ni dawn. Hnathawh tibuai thei tura kawngpui sirah lirthei leh bungrua dah phal a ni lo.

ATMA, Mamit district leh ICICI Foundation chuan nimin khan Dárlâk khuaah vawk vulhtute tan 'Capacity building programme for piggery farmers' an buatsaih a, vawiinah an chhunzawm ang. Seminar-ah hian Darlak khuaa vawk vulha ei zawng mi 32 an tel a ni.

State Institute of Rural Development & Panchayati Raj (SIRDPR) chuan nimin khan an conference hall-ah Tlangnuam RD block huam chhunga khaw 13-a VEC chairman leh secretary mi 23-te tan MGNREGS chungchang zirhona an buatsaih a, SIRDPR director Lalhmunsanga Hnamte-in a hawng. Training hi vawiin leh naktukah chhunzawm a ni ang.